Na lē toe fesiligia le alofa o le tasi i le tasi ina ua tau lau o le faamoemoe na moemiti i ai le tamaitai ia Elaine Pea Poe ma le alii o Akeli Sitagata Vaifale ina ua tuufaatasia le la mafutaga i le faaipoipoga Paia.
O le afiafi o le Aso Faraile 20 o Iuni na faataunuuina ai le faamoemoe i le maota o le Dream Center i Manukau. Na faatumulia totonu o le maota i uo ma ē masani faapea aiga na lua na latou molimauaina lenei faamoemoe tāua.
O le susuga i le faafeagaiga ia Pea Poe o le Ekalesia Samoa Ministry Christ i Niu Sila na saunoa e faafeiloaia le mamalu o le auvalaaulia. Na amata i le tatalo na saunia lava e le susuga i le faafeagaiga ma faagasolo ai loa le polokalame i lea po.
O upu a le atunuu e sui faiga ae tumau lava faavae. O se tasi lea vaaiga tāua sa iai, na mae‘a loa le lotu ona faagasolo lea o faafiafiaga a fanau a le Ekalesia faapea le aufaafiafia mai Rarotonga e pei ona iai aso faapenei, sa sosoo ma le faapaiaina o le keke ma lona faasoaina, faatoa gasolo loa i le taumafataga.
Sa matuā faafiafiaina le mamalu o le auvalaaulia ma aiga na lua i le tautua ma le laumata ataata a le aufaigaluega a le Dream Centre aemaise o ana taumafataga. O le fofoga o le po o le susuga lava i le faafeagaiga ia Pea Poe.
O le alii faaipoipo ia Akeli o le alo o le tamā ia Sitagata Vaifale ma le tina ia Lusia mai le afioaga o Leauvaa, a o le tamaitai ia Elaine o le alo e faasino i le faafeagaiga ia Pea Poe ma le faletua ia Sieni mai le alalafaga o Vaoala.