E lē o fiafia isi sui o le SUNGO i saunoaga a le Ofisa Sili i le Campbell Live
O teu fugalaau manogi na faamatalaina o mosooi ma teuila, na momoli e le savali o sui o le Komiti Faatonu o le Faamalu o Faalapotopotoga tumaoti le SUNGO mo le ofisa o le Palemia, ina ua agai i ai mo se feiloaiga, e mafua i le tusi a le alii Palemia ua faatonuina ai le o ese loa o le SUNGO ma fale ma le fanua o le Malo o loo latou faaaogāina i Motootua.
O le ofisa o loo sosoo ma le maota o loo iai le ofisa o le Ao o le Malo.
Na faaalia e se molimau, o le feiloaiga a le alii Palemia ma nisi o sui o le komiti faatonu na talosagaina ai le taitai o le Malo mo se isi avanoa e faaauau ai pea galuega a le SUNGO i fale ma le fanua o le Malo, ona e leai se isi nofoaga e vave maua e faasee i ai i le taimi nei, aemaise o le aso 30 o le masina nei o loo faaalia e le Palemia i lana tusi, e tatau ona oo atu i ai ua leai se isi o le SUNGO ma a latou meatotino o toe iai i le fale ma le fanua.
E lei auai i le feiloaiga le Peresitene o le faalapotopotoga le tofa Vaasilifiti Moelagi Jackson ma le Ofisa Sili, le faletua o Roina Faatauvaa Vavatau; o laua ia sa faatūtū i ai le lē fiafia o le Palemia ona o saunoaga a le Ofisa Sili i le polokalame o le Campbell Live e faatatau i tupe o fesoasoani o le sunami.
“Ua toatamai tele le Palemia i saunoaga a Roina, ua iloa ai le tetee i le Malo”.
O le finagalo lea o se sui o le SUNGO na ia faamaonia le taulimaina e le ofisa o le SUNGO o le tusi a le Palemia. “Ioe na aumai loa le tusi matou vevesi loa e saili se auala e maua vave ai se feiloaiga ma le taitai o le Malo”.
E iai sui o le SUNGO e lē o fiafia i saunoaga a le Ofisa Sili na fai i le Campbell Live ona ua foliga mai e peiseai o le lagona uma lea o sui o le faalapotopotoga.
Peitai sa tatau ona faaupu o le finagalo fai toatasi o le Ofisa Sili e aunoa ma le aafia ai fua o le faalapotopotoga. Na faaalia e le faletua o Roina sa malaga i fafo i se fonotaga, ae na ia faato‘ā maua le faamatalaga i le tusi a le Palemia ina ua foi mai i le faaiuga o le vaiaso ua mavae atu nei.
Na maua le latou feiloaiga ma sui o le Komiti Faafoe ma laga ai le mataupu. Peitai na faaalia e le faletua sa ia faailoa i le feiloaiga, e lē solomuli o ia mai le faaleoina pea o se lagona e na te silafia e finauina ai le fai mea tonu aemaise o le faaleo ai o lagona o tagata e lē mafai ona maua lea avanoa.
Ua faaalia foi e Roina na mae‘a le feolaaiga a sui o le Board o le SUNGO ma le Palemia ona faailoa ane e Tuilaepa o le a toe ave le mataupu i le Kapeneta e soalaupule ma toe iloilo ai.
Peitai e iai le talitonuga e lē toe suia le finagalo o le Malo ona ua faatonuina e le Palemia le Minisita o Puanaoa Faalenatura ma Siosiomaga, o ia o le taitaifono o fanua ma fale o le Malo, afioga Faumuina Tiatia Liuga, ina ia faia loa se gaioiga e aveesea ai le SUNGO mai eleele ma fale o le Malo.
