E ui i ni lagona toafilemu sa iai le tele o aiga i Ausetalia i vaitaimi o aso fiafia peitai, talofa i nai aiga sa lē maua se faatasiga fiafia ma aiga i ni tafaoga e pei ona masani ai i taimi faapenei.
E lē toe tau faailoaina e pei ona maimoaina i luga o televise, upega tafailagi, faafofoga i luga o leitio ma nusipepa le pa‘ū mamafa o timuga i nisi o vaega o Ausetalia faapea lologa ma tafega o vaitafe ua avea ma ala ua faatamaia ai maota ma laoa o le tele o aiga. Ua leai ni mea taumafa, lavalava ma e ono oo atu ina oo mai ai ni faama‘i i se tulaga faaletonu o le suavai poo le palapala o le a iai.
O le Aso Gafua, aso 3 o Ianuari na saunoa ai i luga o le leitio faavaomalo, le ABC, le afioga i le Tamaitai Palemia o Ausetalia, The Right Honorable Julia Gillard ma tuuina atu lana faamafanafanaga mo aiga uma o loo aafia i lologa e iai Aai nei o Emerald, Rockhamton ma Bundeberg, ma nisi nuu tuaoi.
E lē gata ina saunoa faamafanafana le tamaitai Palemia, ae ua ia faailoa atu le fesoasoani tau seleni mai le Malo mo aiga uma na aafia i lologa atoa ai ma le au faipisinisi.
Sa ta‘ua e le tamaitai Palemia le ootia tele o lona loto a o sau lana asiasiga faapitoa e tusa o faalavelave faanatura na aafia ai le tele o vaega o Kuiniselani.
O nei fesoasoani tau seleni mo aiga na aafia, mo tagata matutua e ta‘i $1000 a le tagata, ae o tamaiti e ta‘i $400 ua mafai ona maua nei tupe i se taimi vave mo le faatauina o lavalava aemaise mea o loo manaomia vave i le taimi nei mai le Commonwealth. Mo i latou la na aafia i aai e pei ona afatia, e ao ona telefoni i le 180 22 66 i se taimi vave auā nei faamāmāavega i vaega tupe. Ma o loo iai le faamoemoe o le a lē gata ai nei fesoasoani ae o le a tuuina atu pea mo se vaitaimi ona o loo faaauau pea timuga ma le faaletonu o le tau, ma o le a tele nisi aai o le a aafia pe a tusa ai ma tala o le tau mo le isi masina o lumanai.
Mo aiga ua faaleagaina meafale ae ua manaomia le toe sui i se taimi vave, ua tuuina atu i ai le tai $4,980, mo fale sa faaleagaina o le a tuuina atu i ai le tai $13,800 mo le toe lipeaina o o latou fale, mo ia tupe e ao ona vili le telefoni 1800 173 349.
Mo le au faipisinisi ua tuuina atu i ai le ta‘i $25,00 mo le toe faaleleia o oloa ma fua o faatoaga ua faaleagaina. Mo i latou la o le au faipisinisi e ao ona vili le telefoni 1800 623 946 ae mo le au faifaatoaga ua tele mea ua faaleagaina ua mafai ona fai a latou nonoga tupe mai $250,000 i se tului laititi mai faletupe.
Sa saunoa le tamaitai Palemia, Julia Gillard o le a galulue faatasi lana faiga malo ma le faiga malo a Anna Bligh le Malo faasetete o Kuniselani auā fesoasoani mo aiga e silia i le 200,000 ma ona tupu ua aafia i nei faalavelave faanatura, 75,000 aiga ua mafai ona oo atu i ai fesoasoani, ae 150 fale poo le sili atu ua matuā goto lava i le vai.
E faatusatusaina nei lologa i le tausaga e 1954 ma le 1991 lea sa matuā mafatia i lologa i lea vaitaimi. E toatasi le faifaiva sa tau sailia i Boyne lea ua faaalia mai ua maua lona tino maliu.
O nisi ua faaaogā paopao e folau ai i isi itu e fia malaga i ai ona o le maualuga o le siisii o le loloto o le vai. E tusia lenei ripoti ua to‘a 12 i latou ua maimau o latou soifua ona o lologa.
O loo unaia malosi e le palemia le fesoasoani a le atunuu lautele ina ia alofagia le mafatiaga o nai nei aiga ua pagatia auā o le tele o nei pitonuu o loo alaala ai lava nisi o si o tatou atunuu. O le faafetai i le Atua auā e ui ina pagatia ae talitonu o loo faamamalu pea ona aao alofa i nai o tatou tagata.
