“Lapataia le atunuu nofo sauniuni i matagi afā”
…vaaitau
Ua tuanai lena vaiaso sa feagai le atunuu ma timuga mamafa faalausosoo, amata mai i le Aso Gafua e oo mai i le Aso Faraile. Peitai e oo mai i le Aso Toonai 2 o Fepuari 2013, ua vaaia le oso a‘e o le la ma aliali mai le lanumoana o le lagi e ui ina fegasoloa‘i ao uliuli o foliga o isi timuga e palasi.
O le Aso Toonai foi na amata lapataia ai le atunuu ia nofo sauniuni i matagi afā poo storm winds e 64 i le 88 kilomita le saoasaoa i le itula. O lapataiga nei o loo faaauau pea e oo mai i le vaiaso fou lenei ua tatou aulia mai, ma ua faailoa ai e le faauluuluga o le vaaitau le afioga Mulipola Ausetalia Titimaea, e ono oo atu le malolosi o ia matagi afā i le 112 kilomita i le itula.
Talu ona aafia le atunuu i uiga faaletonu o le tau amata mai ia Tesema o le tausaga ua mavae atu nei, ua faamauina ai le loloto o le suatimu na palasi talu mai lea masina e oo mai ia Ianuari o le tausaga nei, e maualuga le suatimu na palasi.
O Ianuari lava ia 2013 e 578 mililita, ae o Tesema 2012 e silia i le tasi le afe (1000) mililita ma o se aofaiga ua faaalia e Mulipola e lē masani ai i se masina pe a timuga tetele. O le vaiaso na tea nei lea na timuga ai mo aso e lima, e lei maua mai faamaumauga pe fia se aofaiga. Ae o le maoae o timuga ua palasi na mafua ai ona faataalise atu le vaega o galuega laveai i taimi o faalavelave faafuasei ma fautuaina aiga o nonofo latalata i autafa o vaitafe ma alia aemaise alavai e fesootai ma vaitafe ina ia tuua o latou fale.
Na faatino foi lea gaioiga i le vaiaso ua mavae ina ua toe vaaia le tafe malosi o le vaitafe i Vaisigano lea e aofia ai ma Lelata. Peitai e iai aiga e lei usitaia lea fautuaga e mafua ona o a latou meatotino na toesea e nisi i le tuanai o le afā o Eveni.
Faaalia e le vaega o galuega laveai i taimi o faalavelave faafuasei faalenatura, o nuu sa agai i ai le latou galuega mo le aveesea o tagata e aofia ai Lelata, Leone, Vaisigano, ma Apia.
O aafiaga o le atunuu mai timuga, tafega ma lologa faapea matagi afā malolosi, o loo faanono manū ai pea le atunuu talosia ia lē taunuu ma tau mamao ese ma Samoa.
O le amataga o le tausaga fou lenei na faatino ai e le fono a ekalesia soofaatasi le vaiaso o talosaga ma anapogi e talosia ai le saogalemu o le atunuu mai ni mala faalenatura.
O le vaiaso lenei o talosaga ma anapogi sa faia tonu ile vaiaso o le faasao o le siosiomaga ia Novema o tausaga taitasi, peitai o le tausaga ua mavae na suia mai ai i le amataga o le tausaga ia ogatasi ma le vaitau o uiga faaletonu o le tau.
