E ui na ufitia le ekalesia EFKS Te Atatu i le ao pouliuli ona o le valaau paia a le Atua i se tasi o tina pele o le ekalesia i le vaiaso na tea nei, e pei ona fofogaina e le susuga i le faifeau toeaina Rev. Lucky Slade, ae e lei avea lea ma ala e taofia ai le loto tetele ma le agaga faamalolosi o le autalavou a le Ekalesia i le latou polokalame, ua leva ona tapenaina.
O le polokalame o pese ma tala faatino na faaigoaina o le GLEE, na faataunuuina i po e lua o le faaiuga o le vaiaso na tea nei i le aoga a le Kelston Girls College i Aukilani Sisifo.
Na faaaogāina e le autalavou pesega, o siva, o musika aemaise le ‘au faaili, e faatino ma latou faamatalaina ai le amataga o le galuega a le Eaklesia Faapotopotoga Kerisiano Samoa, ma toe faatepa le au maimoa i le tausaga 1830, lea na taunuu ai le malaga faamisionare a le susuga i le faifeau o Ioane Viliamu i Samoa ma momoli mai le tala lelei i lo tatou atunuu.
Na faatinoina le talaaga o le tala, ina ua faa-Kerisianoina Samoa ma ua oo atu le tala lelei i isi atumotu, e pei o Rotuma, Kiripati, ma Papua Niu Kini, ina ua auina atu misionare mai Samoa e tala‘iina le tala lelei.
O lea galuega o le tala lelei na aafia ai foi ma Niu Sila ma faatūina ai le uluai ekalesia a le EFKS i Grey Lynn, i le tausaga 1962.
E maeu foi le maopoopo ma le talenia o nei autalavou a le EFKS Te Atatu Junior Youth. E matautia gaioiga a lē sa faatonutonuina musika o le po, le alii o Metitilani Alo e 16 ona tausaga.
Na lē gata na ia taina ma taitaiina le faaili i le piano, ae na ia taina foi le kitara, tagipalau ma le faailipu.
I se talanoaga ma le taitai o le autalavou, le susuga Neli Alo, 31 tausaga, na ia faamatala ai le tāua o le faapupula ma le faamatala i augatupulaga talavou le tala faasolopito o le ekalesia, aemaise le faavae o tapuaiga o loo faavae ai Samoa.
Le ekalesia EFKS, le ‘I‘oimata o le Ekalesia’, e pei ona gaganaina i Malua.
‘E tāua le iloa e le tupulaga o o latou tupuaga, aemaise le auala na ui mai ai o latou tuaa, e tāua le malamalama o le autalavou i le faavae o le ekalesia, ma le momoliina o le tala lelei.’
Na ta‘ua e Neli e faapea e ‘Toatele le tupulaga ua o ese ma le lotu ona o le lē malamalama, aemaise o le ituaiga auala o loo faatino ai tapuaiga’.
Na faafetaia e Neli le susuga i le faafeagaiga o lo latou Ekalesia, ‘E lelei tele le matou faifeau auā e taumafai lava e tapu‘e matou le tupulaga talavou, e lē na o tagata matutua. O le taumafai lea e faatino matou sauniga lotu i ni auala e malamalama ai tupulaga’.
‘E faaaogā le gagana Peretania ma le faa-Samoa, aemaise e tuu avanoa i le autalavou e saoloto le tapuaiga i le faaaogāina lea o taga, pese, siva, ma isi auala ma metotia fou i totonu o le lotu. Ua fai suiga e fetaui ma nei ona po’.
E matagofie le faamoemoe ma tapenaga na alo atu i ai le autalavou, peitai na ta‘ua e Neli Alo e faapea, ‘O le mea tāua, ia sosolo ma tupu le tala‘iina o le tala lelei, ma ia viia le suafa o le Atua, ae lē o se viiga o se tagata’.
