Faamatala le faatosaga na ia faafanau Henrietta, ua oti lana pepe

O le suesuega o le mafuaaga lilo o le maliu o le pepe tama a le tina o Henrietta Wulf i le faamasinoga, na faafofoga ai i le molimau a le tamaitai tausi soifua faatosaga poo le widwife na tiute i le taimi na amata ona luluti ai tiga o le tina o Henrietta. E toatasi lava le tausi soifua faatosaga na tiute i le po o le aso 21 o Aperila 2013 lea na fanau ai le tina.
O le Aso Toonai, 20 o Aperila 2013 na taunuu ai Henrietta ma lona tina o Tupe i le falemai i le vaega e fananau ai tina ma m‘itaga ina pa lona vai se‘i tulou. O le faamatalaga lea a Tupe le tina o Henrietta i lana molimau.
O le itula e ono i le taeao na taunuu ai ona vaai ai lea o le fomai ma faia siaki ma iloa ai o loo tata lelei le fatu o le pepe e pei ona molimau le alii fomai sa tiute i le taimi lea. Peitai o le molimau a le alii fomai sa ia maua i ana sailiiliga e iai se faaletonu o le pepe lea e faapea e lē o u sa‘o le ulu o le pepe i le ala fanau se‘i tulou, ae e foliga o loo u mai i lalo lona nofoaga (buttocks).
Na faatonuina ai loa e le alii fomai lea le ave o le tina e fai lona fa‘ata poo le CT Scan e saga sailia ai le tulaga o loo iai le pepe. O le molimau a le alii fomai na ia ta‘ua ai pe ana fai le fa‘ata i se taimi vave ma iloa ai le faamaonia o le tulaga o le pepe, semanu e vave ona faatonuina le taotoga sa ia fautuaina i lana lipoti lea na ia tusia mo le hand over na ave i le isi alii fomai na sosoo ma ia.
Sa ia tusia ai foi se faaupuga, a iai se isi faaletonu poo se mea e manaomia, ona logo vave lea o ia. Na faamatala le faatosaga e faapea e sefulufā tina ma‘itaga sa iai i le po lea, e aofia ai ma tina ua failele ma i latou o loo faatalitali.
O le tele o lona pisi mo le vaaiga o isi tina sa lē tuua ai lona alu pe a alu atu se logo mai le tina o Henrietta mo se fesoasoani.
Na faamatala le faatosaga, poo le itula e 2 i le 3 i le vaveao o le Aso Sa, 21 o Aperila na toe logo atu ai o ia ma alu ane loa. Sa ia siaki le tina ma ia iloa ai ua amata ona luluti tiga ae o loo ia silafia le faaletonu o loo iai le pepe i le manava o Henrietta e pei ona ia maua i le lipoti a le fomai.
Sa ia taumafai loa e vili le fomai sa tiute ma logo i ai le tulaga ua iai le ma‘itaga o le tina. Na faamatala le faatosaga, poo le 4 agai i le 5 i le vaveao lava lea, ae toe logo atu o ia ma alu ane loa ma amata ona faatino lana galuega.
Peitai sa ia matauina ua faigata le tulaga o le tina ma ia faia ai loa le gaioiga faatausi soifua faatosaga o le faaausigo se‘i tulou o le tina, ae taumafai e faafanau. Na ia vaaia ua muamua mai le isi vae i fafo o le pepe sosoo ai ma le isi vae, ona ia logo lea o le fomai tiute e alu ane poo le ā sana fautuaga, ma o le faamatalaga na avane o le faatino loa o le togafitiga e faafanau.
O lana taumafaiga na manuia ma tuu atu loa le pepe i nisi o tausi soifua sa fesoasoani ane ae faia lana galuega o le toe togafiti faamae‘a o le tina o Henrietta. O le pepe e pei ona faaalia e le faatosaga na faia i ai le togafiti o le faamānava i le okesene, mulimuli ane ai loa ave i le potu e taofia ai pepe fou o loo iai ni faafitauli.
O le fomai na tiute le isi molimau na valaau, lea na ia faamatala i le faamasinoga sa ia valaau i le vaega o le xray poo le fa‘ata lea sa faia ai le CT scan ma ta‘u ane ai o le pepe e seela, lona uiga e lē o le ulu o loo u i lalo o le nofoaga ma vae.
A o faia lana molimau sa ia faaalia na te lei tusia ni notes poo ni faamatalaga o tulaga o le tina o Henrietta i le po na tiute ai, ae sa lē mafai ona ia faailoa i le faamasinoga pe aisea.     Na pau lana faamatalaga na te manatua sa ia alu e siaki le tina ina ua manaomia, ma sa iai foi i le taimi na fanau ai. Sa ia faailoa foi i le faamasinoga lona logoina o le fomai sa second call i le po lea ma ta‘u i ai le tulaga ua iai le tina.
O le vaiaso nei e tatau ona maua ai se faaiuga o suesuega nei ma iloa ai le mafuaaga tonu na uma ai le ola o le pepe a Henrietta.
O loo i luma o le faamasinoga maualuga se tagi a le tina ma lona aiga faasaga i le soifua maloloina ma o loo tuua‘ia ai o le uma o le ola o le pepe na mafua i le faaletonu o le tiute a fomai ma tausi soifua na tiute.