Ua atoa le lua tausaga ma masina talu ona gaoia se vaega tupe tele o le penisione a tagata u matutua mai le ofisa o le penisione i le NPF, ae o le vaiaso na tea nei na faatoa fofogaina ai moliaga o le tau faaosooso ma le taupulepule e faatino lea gaioiga ma le gaoia o le tupe e $430,250 tala, o se vaega o tupe e totogi ai le penisione o loo tuuaia ai Tautai Fata, sa galue o se ave taavale i le vaega o le penisione.
O Sione Taateo o se tasi o taulealea na molia ai foi i lea gaioiga, ma o le tausaga na tea nei na lauina ai lona iuga ina ua ioe i lona gaoia o se vaegatupe e silia i le luaselau afe, ma o ia lea o le molimau autu a leoleo faasaga ia Tautai Fata.
O lana molimau na ia faamatala ai o le gaoia o tupe o le penisione o se manao o Tautai na faailoa atu ia te ia i se tasi o a la feiloaiga i le taulaga o Apia. Sa ia faamatala na faapea atu lē o loo molia e manuia uma lava laua pe a taunuu lea gaioiga.
O le Aso Lulu, 15 o Oketopa 2008 na feiloai ai i laua ma toe faailoa atu foi le manao lea o Tautai. O le Aso Faraile, 17 o Oketopa na toe feiloai ai, ma fai atu lē o loo molia e alu atu i le Aso Toonai na sosoo ai sei faasino atu le faitotoa ma avatu le ki e tatala ai le ofisa o le penisione.
Na faailoa atu foi e Tautai ia te ia, e tatau ona iai ni ana mea faigaluega poo se sikukalaiva poo se uamea e ta‘ua o le pinch bar e talepe ai le loka o le faitotoa o le potu o loo loka ai pusa tupe, ona e leai sana ki mo le faitotoa lea. Sa fai atu foi Tautai e tatau ona iai sana moliuila e faaaoga ona e pogisa le potu.
O le Aso Toonai lea na alu ai loa Sione i le ofisa o le NPF, lea na ia taua na tau atu ai i se fafine lapoa ma fesili i ai mo Tautai ae sa tali ane le alii sikulati sa iai, o Tautai o loo agai ese e sue mai se tagata e fufuluina le taavale a le ofisa.
O le taavale lea na faaalia e Sione sa ta‘ua e Tautai i le la feiloaiga o le a fai i le sikulati e alu e sue ane se isi e fufuluina, ae alu atu (Sione e faatino).
O le taavale foi ua uma ona fufulu ae o le a fai se gaioiga e faafoliga ai e fufulu ae ia maua ai le avanoa e o ai ma Sione e faasino ane le ofisa o le penisione ma le potu o loo teu ai tupe. Na ta‘ua foi e Sione, e na o le tolu lava pusa tupe na ia aveesea mai i fafo o le potu sa teu ai, ma ia teena ai nisi o molimau a le itu a leoleo e lima pusa tupe na maua atu o loo taatitia i le ofisa o le penisione ina ua oo atu nisi o le aufaigaluega i le taeao o le Aso Gafua, 20 o Oketopa 2008, lea na fuafua e amata ai ona totogi le penisione mo lea masina.
O le alii loia o loo tu mo lē o loo molia, o le afioga Leuluaialii Tasi Malifa, na ia tuliloa le moni o le molimau tauto a Sione lea ua mae‘a. Sa faaalia e le molimau o pusa tupe lava ia e tolu na faatonuina o ia e lē o loo molia o Tautai Fata e na te tatala pe a oo ina faatino lana osofaiga.
O se atigi taga suka na fafao i ai tupe, ma o se sikukalaiva na ia faaaoga e tatala ai pusa ia e tolu. O le tusa o le ‘afa o le iva i le 10 i le po o le Aso Sa, 19 o Oketopa o le tausaga lava e 2008 na faatino ai lenei gaoiga lea na ta‘ua e Sione i lana molimau, na mae‘a loa alu ese vave ma le ofisa ma oso mai i le fasitepu e agai i lalo, ma sa ia iloa atu le leoleopo ae sa le iloa mai o ia. Na savali agai i le faleoloa o Amau ma kolosi loa agai i lalo o pulu o loo faafesagai ma le faleoloa ma faatali ai loa le taavale na alu ese ai ma le tupe.
E lata i le toluselau afe le seleni e lei maua lava talu mai le taimi na tulai mai ai lea gaoiga tele, e pei ona toe maua se isi vaega o le seleni e silia ma le selau afe tala.
O loo tetee malosi Tautai Fata i moliaga o loo tuuaia ai. Ua toe faaauau ona tuli lona faasalaga soloatoa i le moliaga o le fasioti tagata faamoemoeina sa faasala muamua ai a o lei tupu lea gaoiga ona sa magalo i le palola, ae ua avea lona toe aafia i le gaoia o tupe o le penisione ma auala ua ia le usitaia ai aiaiga o le palola.
E tatau ona aumai se faaiuga o lenei mataupu i le vaiaso nei. E 14 molimau a leoleo e aofia ai Sione Taateo ma nisi o tagata faigaluega sinia o le NPF e aofia ai ma le Pule Sili ma le pule o le vaega o le penisione.
