I nisi o tala mai atunuu mamao o(Contra Costa Times) loo ta’ua ai le faagasolo i se tasi o setete i Amerika o tolaulauga i le faamasinoga o moliaga o se tasi o tina (grandmother) ma se aunt, e tai tolu o la moliaga i lo la faileagaina poo le sauā i ni tamaiti, mai lava i le taimi na taunuu ai nei tamaiti i San Pablo i le masina o Me 2007 e oo mai ia Mati 26, 2009.
O nei tamaiti e o mai Samoa, o se teineititi 14 tausaga, ma ona tuagane masaga e toalua e tai 11 tausaga, ma o loo taua i nei lipoti le tete o le leo o lenei teineititi a o faia ma loimata sana faamatalaga e molimau ai i sauaga na fai e le tina o lo latou tamā (grandmother) ma lo latou aunt ia te ia ma nai ona tei, o nisi taimi e lē fafagaina i latou, e sasa ma tutuli i fafo e tutu i le polotito o le fale o le grandmother mo ni taimi uumi i aso uma, seia oo ai lava ina latou maua le avanoa e sosola ese mai ai lea fale i San Pablo i le masina o Mati i le tausaga nei.
O le tina matua o loo molia e suafa ia Faasese Fiu, ma e tusa ma le molimau a le teineititi, o loo taua ai le seāseā fafagaina i latou, pe seiloga foi o loo lelei faalogona o le grandmother ona faatoa fafaga lea o latou. Ae mo le aunt, le tamaitai o Satu Diaz, o loo molimau le teineititi e faasa ma ita lo latou aunt pe a feinu soo, ma le fia o soo i le fale-lē-taua. O nei faamatalaga o loo faia a o faagasolo le uluai fofogaina o lenei mataupu faasaga ia Faasese Fiu, 56 tausaga, ma Satu Diaz, 34 tausaga.
O nei tamaiti ua tetea o latou matua, ma na musu le tamaloa e ave tamaiti i lo latou tina, ae na manao e ave i lona tina i Amerika. I se faamatalaga a le teineititi, ina ua faatoa taunuu atu i lo latou grandmother i Amerika, sa lelei lava le faiga o latou. Ae lei umi lena lelei, ae amata loa suiga leaga ia ua molia ai nei le grandmother ma le aunt.
Taua foi e lenei teineititi e soo se mea lava e faaaoga e lona grandmother e fua ai latou ma ona tuagane, e oo lava i le lau o se sapelu. Sa musu foi le grandmother e ave latou i le aoga, ona e le manao ia latou iloa le gagana Peretania, e le taitai foi ona aveina i latou i se fomai e tusa lava pe tigaina se isi i taimi e sasa ai e le fafine ma le aunt.
E ogaoga mea sa faamatala e lenei teineititi e tusa o sauaga e faia ia i latou. E faamomoe latou i le potu malolo, ae a oo i le ao ona ave lea e tuu i fafo ae loka le fale, ma a momoe foi e fusifusi o latou vae, ona fai mai le grandmother ia aua nei alu se isi e soai se meaai.
O le fale sa iai nei tamaiti mai Samoa, sa tausi faatasi ai ma le fanau a le latou aunt, Satu Diaz, ae paga lea, sa eseese mamao le tausiga lelei na faia i na tamaiti, nai lo nai fanau nei mai Samoa. Faaalia i lenei lava lipoti, o taimi uma e telefoni mai ai le tamā moni o nai tamaiti, e faamautinoa e le grandmother e faaola le faaleotele leo o le telefoni (speakerphone) ina ia lagona uma atu a latou talanoaga ma lo latou tamā.
O se tasi o tamaiti o le masaga lea na faia le tonu ina ia sosola ese, ona e pei ona taua i le molimau a le teineititi, ua fefefe nai ona tei ona ua latou iloa e leai se avanoa e ono toe foi ai i Samoa, ae le mafai ai lava ona saoloto mai nei faiga sauā.
O loo faagasolo pea la lenei mataupu i le faamasinoga, ma e iai foi nisi o tauaiga o nei mafine o loo auai atu e faalogologo.
