“Na futi lo‘u ulu ma titina lo‘u ua”
E feoloolo lava mataupu ua faatoai i le Toomaga mo Tagata Puapuagatia e faasino i tuuaiga o le faaoolima o leoleo.
E lē mafua ona sulufai tagata e aafia i ni gaioiga e tuua‘ia ai leoleo i lea faalapotopotoga ona o le feita, ae na faaalia e se ofisa sinia o le faalapotopotoga, e mafua ona o le manaomia o le latou fesoasoani ina ia vave ai ona oo ni mataupu poo tagi i le faamasinoga, pe vave ai foi ona faatino le pitolaau a leoleo o le faia o suesuega.
O le tina talavou o Tumau mai Piu Falealili sa tafafao ma sona uso teine i le fale kalapu o le Crappers i Tauese ae tulai mai ai se feseeseaiga ma se alii e faapea o se leoleo. O le faamatalaga a lona tina o Maiava Italia, o lana tama na titina e lea alii ma totolia ai lona ua.
Faaalia e le tina i se faatalanoaga i luga o le telefoni, e tupu lea tulaga o loo iai ma le toalua o lana tama teine i le fale kalapu. Sa iai se la feeseeseaiga, o le mafuaaga atoa o le vevesi, peitai e lei mafai e Maiava ona ia faailoa le mafuaaga tonu.
“Na alu ese vave si a‘u tama ma agai i le ofisa o leoleo o loo lata ane mo se fesoasoani, ae na uu le ulu e se tamaitai leoleo ma toso agai i le potu taofia ma loka ai”. Fai mai le tina o Maiava o le faamatalaga a lona alo tamaitai, e toafā leoleo na faia le faaoolima. “Ua uma ona faaulu le ma tagi i leoleo, ae ua ma sulufai mai i le Toomaga ona ma te iloa e fesoasoani tele lenei faalapotopotoga i mafatiaga o tagate e pei o a‘u ma si a‘u tama”.
Sa taumafai atu se feiloaiga i le Komesina mo se avanoa e fesiligia ai i tuuaiga ua faia faasaga i nisi o le aufaigaluega, ae peitai e lei manuia.
O le faamatalaga a le tina, o lana tama tama foi o loo tuli sona faasalaga i le falepuipui sa faaoolima i ai leoleo i le Toese, peitai na faaulu lana tagi ona o lea foi mataupu, ae na toe tatala ona e iai uiga lē faalogo o lana tama tama na mafua ai.
O le Toomaga foi na sulufai i ai i lea mataupu. O loo loma se faamasinoga o se alii leoleo sinia ma ni tamaitai leoleo se toalua o loo molia i le faaoolima.
O le mataupu i le tina o Faasalafa lea o loo tuli lona faasalaga soloatoa i le falepuipui na mafua ai moliaga i ia Malu o le Malo. Faaalia e le tina o Maiava, e talu lava ona aafia lona alo tamaitai i le faaoolima e lē o toe faatasia ma lona toalua.
