Faamatala e le au faigaluega a le Westpac gaioiga a le au gaoi

E na o le toalua taulelea na savavali atu i totonu o le lala o le faletupe o le Westpac i Vaitele-tai i le aso na osofaia ai e le au gaoi e toafā.

O le molimau a le tamaitai faigaluega o Tausulu Taua, na ia lē iloaina le isi toalua e toafā ai i latou na faia le gaoiga ona o le taimi lea o loo tau fu‘e tupe i totonu o le masini tala tupe.

O le alii o Faiga Victor Tanielu o le tasi lea o le au faomea na iloa lelei e le tamaitai ona foliga. Fai mai o ia i lana molimau sa uu atu e lē ua molia se agaese, lea na faafefe ai o ia.

O le vaiaso na tea nei na faagasolo ai le suesueina o molimau a leoleo e lagolago ai moliaga o le faomea, ma le faaaupegaina i se agaese (sapelu) ma se laau malosi o taulelea e toalua o Faiga Victor Tanielu, ma Robert Newman Chong Nee.

O i laua ia mai le toafā o taulelea na tetee i o la moliaga, ae o Nazario Chong Nee le uso o Robert na ioe, seia vaganā le isi taulealea o Shane Chan Tong na maliu i sona gasegase, ae o loo faatali le taimi e tulai ai i le faamasinoga.

Na faamatala le tamaitai o Tausulu Taua i lona faateia tele i lea taeao i le mea na tupu, aemaise lava ina ua faalala atu ia te ia e le tasi o taulealea le sapelu i lona talitonuga o le a faaaogā ia te ia.

Na faaalia foi e le tamaitai e $180,000 le tinoitupe na alu atu ma ia i le taeao lea mo le masini tala tupe i Vaitele-tai a le Westpac bank, peitai e na o le $160,000 na mafai ona fu‘e i le masini ona ua lē ofi.

O se tagata faigaluega na ia faamatala i lana molimau lona gatete ma le fefe ina ua ia vaaia ia alii e toafā o ulufale atu, ma ni aupega e pei ona ia faamatala i luma o le faamasinoga o se sapelu ma se fana.

Fai mai le alii o Christopher Pesa mai Fasitoo-uta sa vave ona ia mafaufau i nai ona mātua i le taimi lea ma o lona mafaufau na iai ailoga a toe vaai i nai ona mātua.

E ui i ia lagona o le alii o Christopher ae na ia ta‘ua i lana molimau e na o le 4 i le 5 minute le umi na faatino ai le osofaiga a alii e toafā na ulufale faamalosi ma gaoi tupe a le Westpac.

O taualumaga o le faamasinoga i le vaiaso ua mavae na suia ai le tali a le alii o Robert Newman Chong Nee mai le tetee i le ioe, ma o le Gafua o le vaiaso nei, 27 o Setema 2010 e aumai ai se faaiuga a le faamasinoga mo ia.

Ae mo le alii o Faiga Victor Tanielu, o le masina fou ua toe tolopo i ai taualumaga o lona faamasinoga ona o nisi o tapenaga a le itu a leoleo, e mafua ona ua suia le tali a Robert ma o loo manaomia e leoleo e molimau mo le latou itu faasaga i le alii o Faiga Victor Tanielu.