O le fesili tele lea o loo mapuna ane pe faamata e tuuitiitia ai le faatupulaia pea o le faitau aofai o soligatulafono e aofia ai feusuaiga faasolitulafono ina ua tatala aloaia le lesitala e faamaumau uma ai suafa o i latou e fai ma o latou vaisu le fiafia e fai ia ituaiga soligatulafono.
O le itu o loo laualuga i le faalauiloaina o le lesitala lenei, o puipuiga o fanau laiti e fai iai faiga lē popoi a i latou e fiafia e fai lea soligatulafono.
E pei la o se tasi o mataupu na lipotia i le faamasinoga maualuga i Apia, i le 2012, i se alii 45 tausaga le matua, ae ona faia ni uiga matagā i se teineititi na’o le 7 tausaga le matua. O lea lava alii na toe molia ma faasala e le faamasinoga i lona toe faia lava o uiga matagā i se isi foi teneititi na’o le 7 tausaga le matua.
O le faamasino na seei i le mataupu, Vui Clarence Nelson na ia saunoa, i le mataupu lava lea ua tatau ona faatino loa se lesitala e lesitala ai suafa oi latou o loo faia ituaiga soligatulafono, ona e tāua le iloa e tagata o ituaiga tagata o loo latou nonofo vavalalata, ma o loo manino foi i le mataupu lea na aafia ai le teineititi 7 tausaga le matua. O le vaiaso na tea nei lea na tatala aloaia ai le lesitala lea i Samoa, ma na faatupeina e le UNICEF ona o le faanaunauga ia puipuia malu fanau lalovaoa i le atunuu ma o loo i lalo o le vaaiga a le matagaluega o leoleo.
Na matuā faamausali le manatu ina ia faatu le lesitala, i se isi foi mataupu na finauina e le faalapotopotoga o le Toomaga mo ē Puapuagatia, le Samoa Victim Support Group, ina ia iai se faatonuga e faasā ai ona toe latalata ane se alii e aiga lelei ma le teineititi 5 tausaga le matua lea na ia faia iai ni uiga matagā. O le faamasinoga na faatoa iloa ai, e lē o le taimi muamua lea na faia ai e lea alii nei ituaiga soligatulafono, na faatietie mai foi i le tipoti mai Amerika i lona faia o lea lava soligatulafono. O lona uiga e aofia uma i le lesitala lea, ma i latou na o latou faia uiga matagā i teineiti laiti a’o aumau ai i atunuu i fafo, e le gata i lea o totonu i Samoa nei. “O le a pueina o latou ata, atoa ai ma ni faailoga i o latou tino e iloa gofie ai, o igoa, tausaga ma le nofoaga e nofo mau ai ma soo se faamatalaga, ona faamauina lea i le lesitala.” “Peitai o le a lē mafai ona faalauiloaina faalauaitele o latou suafa poo latou ata.” Saunoa le Komesina o Leoleo, Fuiavailili Egon Keil, e galulue faatasi le Ofisa o leoleo ma le matagaluega o le faamasinoga, o lona uiga se’i vagana ua avatu se faatagaga mai i le ofisa o faamasinoga ua tatau loa ona aveese le igoa o se isi mai i le lesitala ona faatoa aveese lea.
E na’o le toa sefulu le aofai o alii ma tamaitai leoleo o le a galulue faapitoa i le vaega tonu o le a nafa ma le lesitala, ma o Samoa o le taimi muamua lea ua fai ai se lesitala e faamaumau ai uma suafa oi latou o loo faia lea solitulafono.
O ituaiga soligatulafono o loo lipotia i le matagaluega o Faamasinoga e aofia ai feusuaiga fai faamalosi, mataifale, uiga matagā, faamalosi teine, o feusuaiga ma teineiti i luga a’e o le 12 tausaga le matutua, ae i lalo ifo o le 16 tausaga le matutua ma isi soligatulafono tau feusuaiga e fai faamalosi, faasotoma, mulilua ma le faasalalauina o ata matagā i luga o upega tafailagi. Ae na faaalia e nisi o le mamalu o le atunuu, talosia ae tau tuuitiitia ai le faatupulaia o ituaiga soligatulafono ia i le faamasinoga.
