O le aso i le Faamasinoga o Fanua ma Suafa i Mulinuu, ua toe faagasolo ai suesuega a lea faamasinoga i le tagi a alii ma faipule o le afioaga o Vaiee, faasaga i se faiganuu fou ina ia soloia.
E lē fou mataupu faapenei e oo i foga a le Malo, peitai la o le talosaga a alii ma Faipule o Vaiee ua faasaga i se tasi o matai tāua o le nuu, o lē sa avea ma faipule o le Palemene i le paeaiga ua tuanai, le afioga Tuia Paepae Pua Letoa ma nisi o matai o loo faatea ma le faiganuu ona ua latou faatino se faiganuu fou.
O le autū lea o le talosaga ia faamaonia e le faamasinoga, e tasi lava le faiganauu a Vaiee o le faiganuu lea o loo iai alii ma faipule.
O le afioga Te‘o Rimoni Ah Chong o loo taitaia le itu a alii ma faipule, ma o le mau a le itu tagi, e lē mafai e se matai o loo faatea ona fai se isi faiganuu.
O folasaga sa tuuina atu i le faamasinoga ina ua amata fofogaina le mataupu lenei i le Aso Faraile i ona tua atu, na faaalia ai sa faatea le afioga Tuia ma le faiganuu ona o nisi o mafuaaga e pei o lona sui o faavae o le afioaga. Peitai sa tu i ai le Tootoo ia toe foi atu ae sa teena i le finagalo o Tuia, ona i lona finagalo, sa tatau ona afio atu Te‘o ona e lē feagai ma le matai na tu tootoo.
O upufai faalotoifale o nuu ma afioaga o Samoa e iai taimi e sousou ai ma faigata ona taofiofi i‘u maea o finagalo o le aufaiupu o iai le uta ma le tofa, ma a oo loa ina faifai tetele e taunuu lava i le faamasinoga.
O loo faaauau pea lenei mataupu lea o le a suesueina ai le itu tetee.
