Faamasino le EFKS ma Taimalelagi ma Tupuivao, ae fasi ai fua le pulenuu o Lalovi

O le lomiga 186 a le nusipepa a le Samoa Post i le vaiaso talu ai, aso 17 Aukuso, sa lipotia ai le faaoolima o nisi o le pitonuu i Fuailoloo i Mulifanua i le pulenuu o Lalovi, o le isi lava pitonuu o le afioaga o Mulifanua.
E pei ona taua i lea lava lomiga se faamatalaga auiliili a le tofa ia Seulu Ioane, lea sa aafia i le aao malosi o nisi o le pitonuu o Fuailoloo, i le mafuaaga na mafua ai ona aafia fua le foaga a lei fai misa.
O le maea ai o le faamasinoga i le fale faamasino o fanua ma suafa i Apia, i le va o le ekalesia EFKS a le afioaga ma le isi itu sa taiulu i isi foi tamalii o le nuu, Taimalelagi Naotala, ma le afioga ia Tupuivao Naoupu Poloa, ae tulai mai ai loa lea faafitauli.
E pei ona taua e Seulu i lana faamatalaga i lea lava nusipepa, na ia faailoa ai le mea moni sa tupu.
Ona o ia sa taitai i le tapuaiga i lea aso, o ia foi la sa taumafai atu e fai so latou sao, e ala i se lauga e faafetai ai le alofa o le Atua, atoa ai ma se faalaeiau i le gasegase sa feagai ai ma itu e lua i totonu o si o latou nuu. Peitai e le o lea le faitau a nisi o matai o le pitonuu i Fuailoloo, ma mafua ai loa ona faaoolima ia te ia.
O le taunuu mai o le afioga ia Tupuivao Naoupu Poloa i le ofisa o le Samoa Times i le vaiaso na tea nei, sa ia toe faaopoopo ai ma ia lagolagoina malosi le faamatalaga a le pulenuu o Lalovi, le tofa ia Seulu Ioane.
O le itu na te lagolagoina ai ona e moni o le latou faamasinoga na mafua ai ona oo le loto tiga i sui o Fuailoloo, ma faia ai loa lea tulaga le manuia ma le solitulafono.
Faailoa e Tupuivao, masalo o le loto tiga tele o le pitonuu i Fuailoloo i le faaiuga sa tuuina ane e le faamasinoga i le latou mataupu ma le ekalesia, o le mafuaaga moni lava lea. O le mataupu i le sueina o le pule o le fanua o Fogalefue i Fuailoloo i Mulifanua, o le fanua tonu lea o loo iai le malumalu o le ekalesia EFKS i le taimi nei.
E talitonu Tupuivao o le nonofo ai o Fuailoloo ma Lalovi i le latou faiganuu ua maea ona faaiugafonoina faaletulafono, ma ua faamaonia e fai lava le faiganuu a Lalovi latou, faapena foi ma Fuailoloo. Peitai e le o taofia ai le tuufaatasi i taimi e finagalo ai tamalii ma failauga o Mulifanua poo pitonuu e lua.
O le aotelega o le finagalo o Tupuivao Naoupu Poloa, o se tasi o matai o le afioaga o loo alaala ma papaaao i Niu Sila, sa ia tauaaoina mai ai ni mau tusitusia poo le faaiuga o le faamasinoga lea na mafua ai le aafia fua o le pulenuu.
O lea faaiuga ua faamaonia mai ai o lana itu, le itu tagi o lea faamasinoga, ua manumalo i le pule o le fanua i Fogalefue i Fuailoloo i Mulifanua.