O le feagaiga lea e faapuupuu o le CEDAW – ua faamautu e le tele o Malo o loo i le Faalapotopotoga o Malo Aufaatasi, ina ia tafiesea ai soo se faiga faailogatagata e faia faasaga i tamaitai.
O se feagaiga ua leva foi ona faamalosia e Samoa ma o tiute la e faatino i lalo o le feagaiga lenei e asia lava i soo se fono tele a Malo Aufaatasi, ma le faamoemoe o tausaga uma lava ma unai le faamalosiga o tulafono ina ia puipuia ai tamaitai o le lalolagi.
Mo Samoa, ua tele suiga ua vaaia aemaise lava i totonu o le lima tausaga ua tuanai nei. O tausaga uma lava foi la e tuu atu ai lipoti a le Malo, e tatau ona iai ma se isi lipoti i galuega lava o loo faatino o lea maliega mai i Faalapotopotoga tumaoti.
E ta‘u le lipoti lea i le gagana Peretania o le Shadow Report. O lona uiga e tatau ona mātau lelei e faalapotopotoga tumaoti poo faamaonia le lipoti a le Malo ae pe o sa‘o foi faamaumauga o loo tuuina atu i Malo Aufaatasi.
O le tausaga la lenei, ua mae‘a le lipoti a le Malo ae e lē o iai se lipoti mai i Faalapotopotoga Tumaoti. O le vaiaso ua mae‘a atu lea na faatautaia ai loa se feiloaiga ua taloina e le Faamalu o Faalapotopotoga Tumaoti le SUNGO ina ia mafai ai ona talanoa ma iloilo lelei galuega ia ua mae‘a faatautaia.
O faalapotopotoga tumaoti ua tele ina feagai ma galuega fesoasoani mo tamaitai ua sauaina. E lē gata i le ofo atu o faatalatalanoaga ma fautuaga ina ia fesootai aiga – ae ua oo lava foi i le tulaga ua ave ai e nisi o faalapotopotoga tumaoti nisi o alii i le Faamasinoga ona o le afaina o tamaitai i totonu lava o o latou aiga.
Ua faapea foi ona galue le malo e ala i le Matagaluega o Faamasinoga. I le lua tausaga talu ai na molimauina ai le siitaga o faasalaga e faia faasaga i soo se tagata e faamaonia le faia o solitulafono faasaga i tamaitai.
Ua tele ina faaluaina le faasalaga mamafa sa iai i le fitu tausaga i le falepuipui – ae ua iai lava i latou ua sili atu i le 20 tausaga faasalaga i le falepuipui ona o ia lava solitulafono.
Ua faapea foi ona faamautu e le Ofisa o Leoleo le vaega faapitoa e tali atu ai i sauaga i totonu o aiga ina ia tuu eseese ai ma isi solitulafono ae sagai ane Malu o le Malo e unai aoaoga, faalauiloa ma fautuaga e ala i feiloaiga i afioaga, aoga ma faalapotopotoga lotu e talanoa sa‘o lava le tele o mafuaaga o le tulai mai pea o sauaga faasaga i tamaitai ma isi faiga faailogatagata.
O le isi lava suiga tele lea ua agai uma i ai le Malo ma Faalapotopotoga Tumaoti o le unai lea o le manaoga o Malo Aufaatasi ina ia maualuga le numera o tamaitai i totonu o Palemene ma o se galuega ua vaaia ai nei teuteuga o tulafono i le taimi nei ma ua felafoai ai foi le toatele o le atunuu – o nisi ua tetee i ai ae o isi ua matuā lagolagoina lava.
O le masina la o Iulai lea o le a toe usuia ai le fono tele a Malo Aufaatasi ma folasia ai loa galuega ua faatino e Samoa i le taofiga o nei uiga lē talafeagai ma le soifua o tamaitai.
O le faamoemoe e oo atu i ai ua mae‘a foi ona tuufaatasia le lipoti a Faalapotopotoga Tumaoti e pei ona feiloai ai i lenei vaitau o le tausaga.
