“Ua faamalieina le faamasinoga i molimau o oulua na faia le solitulafono”…Faamasino, Mata Tuatagaloa
Na tetee malosi taulelea o Ioane Vaipaipa 34 tausaga le matua, ma Taualii Lemusu 32 tausaga le matua o Solosolo, i le moliaga a leoleo o le susunu fale. O le teena e i laua o le faia o le solitulafono na saili ai e leoleo ia latou suesuega molimau e lagolago ai le faia e ia alii o le solitulafono.
O Ioane ma Taualii ua faamaonia nei e le faamasinoga o laua lava na susunuina le maota o le afioga Leota Leuluaialii Ituau Ale, o se tasi sa avea ma faipule o le Palemene sa avea ai ma Fofoga Fetalai fetalai i paeaiga ua mavae a le fono aoao faitulafono.
O le aso 17 o Fepuari o le tausaga ua mavae 2012 na tulai mai ai le faalavelave i le afioaga o Solosolo ina ua liu efuefu le maota o le afioga i le Faasisina i le malaia. O le faalavelave na tupu e fesootai ma ni mataupu i totonu o le afioaga na faamasino ai ma Leota i le faamasinoga o fanua ma suafa ona o le faiganuu a lea tamalii, lea ua iai le iuga a lea faamasinoga ina ia soloia ae foi lava ia le faiganuu e tasi a alii ma faipule o Solosolo.
O mataupu nei sa vesia ai le lotoifale o le afioaga ma Leota Ituau Ale na oo lava i se tulaga na molia ai lea tamalii i se tagi a alii ma faipule o le lē usitaia e Leota o le faaiuga a le faamasinoga i le taofia o lana faiganuu.
O lea faamasinoga na faamaonia ai moliaga o lea tamalii ma faasala tupe ai. I le fofogaina o le faaiuga a le tamaitai faamasino o Mata Tuatagaloa i le Aso Faraile ua mavae, na ia saunoa ai o le faamalieina o le faamasinoga i mau a leoleo ona o loo manino ua na o Ioane ma Taualii na vaaia o la tino i le fanua na tupu ai le faalavelave, ma e leai foi se isi lava tagata na vaaia ai ua na o i laua. O ia taulelea ua faamaonia o la moliaga o ni tagata lava o le afioaga, ma o ni alo e faasino i nisi o matai o le nuu.
Na faatumulia le potu faamasino numera 4 o le faamasinoga faaitumalo i Mulinuu i le toatele o le tapuaiga a aiga ma sui o le afioaga, aemaise o i latou e lagolagoina itu e lua o le faamasinoga. Na toamalie le faaiuga o le fofogaina o le mataupu ona sa vaaia le feololo o le numera o alii leoleo sa tiute i fafo ane o le potu faamasino.
O le Aso Toonai na tea nei na fono ai le afioaga ma na faailoa mai e se tasi o tamaitai o le nuu, e iai le talitonuga o se fono sa talanoaina ai le taunuuga o le faamasinoga. O le aso 2 o Aukuso 2013 o le a lauina ai se faasalaga o Ioane Vaipaipa ma Taualii Lemusu, ae ua taofia nei i laua i le vaavaaiga malu a leoleo i le falepuipui i Tafaigata e faatali ai le aso ua tolopo i ai le faamasinoga.
