Ua aumai le faaiuga a le faamasinoga maualuga i suesuega o moliaga faasaga ise tasi o tamalii sa galue o se tausi tusi sinia i le Ofisa o le Tiute mo le 29 tausaga, le susuga Joe Fepuelai, ma ua faamaonia moliaga e 4 o le gaoi a o avea ma tagata faigaluega, ae soloia moliaga e fitu o le faasese o faamaumauga tau tupe ona ua le mafai e leoleo ona faamaonia. O le taunuuga lea o suesuega na amata i le tausaga ua mavae 2008 e tusa o molimau na tuuina atu e leoleo e lagolago ai moliaga faasolitulafono.
O le mataupu lenei na faia i ai se suesuega a leoleo ma le ofisa o le suetusi sili a le Malo, ina ua tulai mai ni faaletonu tau tupe i le Ofisa o le Tiute. O suesuega foi ia na molia ai ma se tasi o tagata faigaluega sinia sa galue o se tausi tusi ma suetusi faalotoifale a le Ofisa o le Tiute, ma ua maea ona tuli lona faasalaga faafalepuipui ina ua ioe i se moliaga e tasi o le gaoi a o avea ma tagata faigaluega.
O le suesueina o le mataupu na faailoa ai e Joe Fepuleai i lana molimau tuu fofoga e faapea o se gaioiga masani a le aufaigaluega o le Tiute le aitalafu o tupe e maua atu i auaunaga masani a le ofisa. O nisi tupe ua toe totogi atoa a o nisi e totogi faaafaafa sei faamaea i se taimi, a o nisi tupe ua faaaoga ma toesea. O lea faiga na mafua ai ona aliae ni tuuaiga i le leiloloa o ni seleni mai lea ofisa o le Malo o loo ua i lalo nei o le Matagaluega o Tupe Maua, ua iai faatasi ma le ofisa o Lafoga. O tausaga ua mavae sa eseese pulega o nei ofisa o le Malo ae o le taimi nei ua tuufaatasia i lalo o se pulega se tasi.
O faaletonu na tulai mai i le tausaga e 2004 na faia ai loa se suesuega a le ofisa o le suetusi sili a le Malo ma maua ai faaletonu, lea na saga faamautuina i se suesuega tau soligatulafono na feagai ma le ofisa o leoleo, ma mulimuli ane faia ai moliaga faasaga i le susuga Joe Fepuleai, ma le tamaitai o Pepe Tevaga, sa avea ma suetusi sinia a le Tiute. Sa ia taua suafa o nisi tamalii sa galulue ai i le taimi a o faigaluega ae ua faamalolo, ae o nisi o le aufaigaluega sa ia taua suafa o loo faaauau pea ona tautua i le ofisa o le Tiute. O le molimau foi lea a Joe sa ia taua ai e faapea o se tasi o tagata faigaluega sinia (taofia le suafa) sa fai atu foi ia te ia mo se $1,000 tala ma sa usitai i ai. O se isi tagata faigaluega sa molimau e lagolago moliaga a leoleo, na teena e Joe lana molimau e faapea o le ua molia na faaaogaina se tinoitupe e $1,115 tala. Peitai na faailoa e Joe o le tupe lea na ia tapa mai lea tagata faigaluega o se aitalafu e na o le $1,000 tala na avatu ae taofi lava e le tagata faigaluega lea le $15 tala.
O se siakitupe e $1,249 o loo tuuaia ai foi le ua molia na ia teena ma lana faamatalaga e faapea e leai sona iloa i lea vaega tupe, ua na o le sa avea ma ona taitai i lea taimi (Pepe Tevaga) na te silafia le mea na ave ma faaaoga i ai lea seleni. O nisi o faaletonu sa faamatala e le molimau, o nisi taimi e toesea ai se tai $20 poo se $50 tala mai fusi tupe pepa poo bundles lea e avatu uma e le kesia ia te ia mo le toe siakiina pe a maea galuega o le aso. Sa fesiligia Joe e lana loia o Leuluaialii Tasi Malifa, poo le a sona silafia o fea sa ave i ai tupe. Na tali o ia e faapea o nisi aso ua leai se tupe a le ofisa e faatau ai se ti mo ni tagata e afea le matagaluega, ona ave lea i ai o tupe ia.
O se tasi itu faigata na faaalia e Joe, o nisi aso e oo lava i le miliona tupe e maua i pili ma auaunaga eseese a le ofisa e maua, ma e alu se fia itula o tau faitau ma o le isi lea tulaga e mafua ai ona leiloloa nisi tupe pe misi foi le faitau a le kesia, ae faatoa maua pe a oo atu ia te ia mo le faapaleniina o tupe ma toe siaki pe ua sao le aofaiga. Na fesiligia le ua molia e lana loia i nisi o faamaumauga o loo i le tusi lisiti autu (master receipt book) o loo ia toe suia ai aofaiga o tupe ma lana sainigalima o iai. O le isi lea autu o moliaga a leoleo faasaga ia te ia, o le faasese lea o faamaumauga tau tupe (falsifying accounts and defraud). Ae na tali Joe e mafua ona ia toe suia fuainumera ona e lei sao ona siaki tupe e le kesia, pe ua toesea nisi tupe. O nisi foi aso ua ova mamao ma tele le aofaiga o le tupe ua maua nai lo faamaumauga e avatu e le kesia.
Ua teena e Joe molimau a nisi o le Matagaluega o Tupe maua e pei o Auelua Apoiliu Warren, lea na molimau ina ua ia tauaveina le vaaiga o le vaega o tupe a le Ofisa o le Tiute i le tausaga e 2004, na ia maua i ana suesuega ni faaletonu. Sa ia fesiligia Joe i nisi o tupe ua leiloloa, ae sa leai se tali. Sa fautuaina e Auelua e toe totogi atu seleni ua toesea, peitai na faamavae lava le ua molia mai le ofisa i le masina o Fepuari o le tausaga e 2005, e lei totogia. Ae peitai e oo ane i le masina o Iuni o le tausaga lava lea ua toe maua ane i faamaumauga ua toe totogi le seleni ae leiloa poo ai na totogia.
Sa molimau se tasi o tamaitai o le ofisa sa iai se taimi na galue ai i le vaega o le kesia. Sa faamatala lea tamaitai na te manatua e iai le taimi e avatu ai e Joe se fasipepa e tusi atu ai le aofaiga o se tupe e avatu, ma na te faia ona e faapea o le masani lea sa iai. Ua tetee foi le ua molia i lea molimau. Talia le faasalaga o lea tamalii mai le faamasinoga i le masina fou o Iulai.
