Faamaonia moliaga o le faipule ma matai Satapuala

E na o le toavalu matai ma nisi o le nuu o Satapuala e aofia ai le afioga i le Faipule o Aana Alofi Numera 3, Toesulusulu Cedric Schuster ua faamaonia o latou moliaga, ae teena ma lē faamaonia moliaga o isi matai ma tagata e toasefulu o le afioaga.
O i latou uma ia na molia e leoleo ona o le feteenaiga sa tulai mai ma leoleo a o taumafai atu le vasega o le malu o le Malo e faata‘ape le pāmaa na poloka ai se vaega o le alatele o le malo i Satapuala i le tausaga ua mavae.
O le toavalu ua faamaonia moliaga o le tau faamata‘u, lafoina o upu taufaifai, le faalavelave i tiute o leoleo ma le taofiofi o le faatinoga o galuega a le malu o le malo, e aofia ai, Muagututi‘a Leao Akeripa Toalepaialii, Ga Sakaria, Vaili Mimita, Iliolemalae Faamau, Lua Aiga, Sami Ili, Tagi Fifita, ma Toesulusulu Cedric Schuster.
O moliaga ua faamaonia faasaga i le Faipule ma nisi o matai o le nuu, o faasalaga o loo aiaia i le tulafono e mafai ona faasalaina i le falepuipui mai le tasi le tausaga e oo i le 3 masina, ae o loo iai foi le avanoa e mafai ai ona faasala tupe.
Faaalia e le afioga i le Faipule ua na talia le faaiuga ua aumai, ae o le a iloa se isi laasaga e oo i ai le taunuuga ua aumai pe a lau se faasalaga o latou i le aso 5 o le masina fou o Aukuso. Ua faamalulu le afioga Toesulusulu Cedric i le tapuaiga a le itumalo ona o aafiaga o ia o le Faipule i le mataupu sa i luma o le faamasinoga.
O lana saunoaga i tusitala i fafo o le maota faamasino ina ua mae‘a ona lau le iuga, o le faafetai lea i le tapuaiga a ona aiga ma lona nuu. O afioga i alii loia Tuala Karanita Enari, ma le susuga Papalii Li‘o Taeu Masipa‘u, sa tulai mo matai, le Faipule ma tagata o Satapuala ua lē faamaonia o latou moliaga.
Faaalia e Papalii Li‘o, e toafā i latou na tulai ai Tuala Karanita ua faamaonia moliaga e faapea ia te ia e toafā e aofia ai le sui Faipule. O le susuga Papalii Li‘o Masipa‘u o se isi o Faipule o le Palemene ma o se sui auai o le vaega faaupufai o le Tautua Samoa faatasi ai ma le afioga Toesulusulu Cedric Schuster.
O le faatumauina ma le soloia o le tofi faipule o Aana Alofi Numera 3 o loo umia e Toesulusulu, o le faaiuga lea a le Fofoga Fetalai e fua i taiala o tulafono tumau a le Palemene e faasino i se Faipule e faamaonia ni ona moliaga faasolitulafono i le faamasinoga.
E faatoa iloa lea faaiuga pe a taunuu i le Fofoga Fetalai se tusi aloaia mai le faamasinoga e faailoa ai le faaiuga o moliaga o le sui Faipule o Aana Alofi Numera 3. Sa faatumulia le tapuaiga a le nuu o Satapuala faapea aiga o i latou sa molia ma faamasinoina.