Ua faamaonia e le faamasinoga moliaga faasaga ia David Nomeneta Uaine o se alii mai Tuanai lea na ia faia ni faiga faasolitulafono o le faatauina o tusifolau ma lona faia faananā o le faatumuina o pepa talosaga mo tusifolau mo tagata e lē o. ni Samoa.
O le faaiuga o le vaiaso na tea nei lea na faia ai le faaiuga a. le afioga i le Faamasino Tafaomalo Leilani Tuala, faasaga i le mataupu. E 32 moliaga faasaga ia David, ona o lona faatumuina lea o tusi talosaga mo tusifolau a i latou e lē o ni tagatanuu a Samoa i se faiga faasolitulafono.
O moliaga e 32 na faatino i le taimi a’o faigaluega David o se alii ofisa o le ofisa o Femalagaa’iga 2016 i le 2017. Na tuua’ia foi David, i tusifolau e 6 na ia faatumuina, e 5 tusifolau ua mae’a ona fai ma ua lafo i tagata na talosaga mai i ai, ma na masalomia na ia maua mai ai tupe i le faatauga o tusifolau.
I le suesuega o le mataupu lenei na fofogaina ai le faamasinoga, o se tasi o tagata na talosagaina lona tusifolau o Franco Fiu Rudolph. E fitu moliaga e aofia ai le faamalosia o le saini sese, o le faaaogāina o pepa taufaasese, faamaonia o pepa sese e faimalaga ai, o le faia o faamaumauga i le masini komepiuta, o le faaseseina o tusi talosaga mo tusifolau, o faiga piopio i le tuufaatasia o tusi talosaga, ma le tuuina atu o tusifolau i se faiga lē talafeagai.
O le isi tagata na talosaga o Mark Filo, o moliaga e tutusa lava ma Fiu Rudolph. O le isi tagata talosaga e suafa ia Dave Afele Allen, ma e 6 foi moliaga o loo molia ai David. O Miriama Hugo le isi igoa na ave i ai le tusifolau e David.
O isi o Antonette Lima Moafanua ma e tolu la moliaga, e aofia ai le taufaasese o le saini, faaaogāina o pepa taufaasese mo femalagaa’iga atoa ai ma faiga piopio. E faapena foi moliaga o David o loo lisiina o latou suafa na faatau i ai tusifolau. O le isi tagata e suafa ia Janet Hugo.
O le molimau tusitusia ma molimau na fofogaina e le ofisa sinia o le Ofisa o Femalagaa’iga ina ua fai lana molimau na ia faamaonia ai le tele o tupe na o latou faamaumauina na lafo mai e tagata mai fafo mo David, ma o nei tupe e eseese, ma e eseese foi atunuu e lafo mai ai. Peitai o le atunuu lea e lafo soo mai ai tupe mo le tagata e igoa ia David, o le atunuu o Filipaina.
I suesuega na tau masalomia ai lē ua molia e faapea na galulue faatasi ma se tasi o tagata ua faaigoaina o se tagata faavaomalo ua lauiloa i le taufaasese, peitai na faaalia i le faaiuga a Tafaomalo, e lē faamaonia ma e leai ni faamaoniga i lea tulaga.
Mai i le 32 moliaga na molia ai David, e 24 moliaga ua faamaonia, ma o ia moliaga e aofia ai le 6 o moliaga taufaasese o le saini, e 4 moliaga o faiga faapiopio poo le corrupt and bribery, 6 moliaga o le faaaogāina faasese o pepa, forged documents, 4 moliaga o le faamalosia o le faaaogāina o pepa malaga Samoa, 4 moliaga o le faaaogā sese o pepa malaga, ma le isi 4 moliaga o le faia faasese o tusi talosaga mo le faamoemoe o le faatumuina o pepa malaga.
E lei mafai ona faamalieina le tamaitai faamasino i isi moliaga e aofia ai le 4 o moliaga i lona faamaumauina o tusifolau i se faiga taufaasese i le masini e faamaumauina uma ai faamatalaga e faatatau i tusifolau.
O loo tatala pea i tua David seia aulia le aso 11 o Aperila e tolaulaina ai lona faasalaga i moliaga e 28.
