Mautinoa e taofi eseese le atunuu i le tele o mataupu e faafofoga ma faitau i ai i aso taitasi, masalo o le lagona lava foi lea e tasi ina ua faalauiloa mai i le ogatotonu o le vaiaso na tea nei le faaiuga a le faamasinoga ua faia e uiga i le mataupu e aofia ai ni tamaiti Samoa lea na o latou osofaia le faleoloa o se alii Initia i Manurewa i le masina o Iuni 7, o le tausaga 2008.
O se faalavelave na matuai gugulu ai foi le atunuu aemaise ona o le tulai mai o ni alii Samoa uma na aafia ai i lea mataupu. I le faailoaina ai o le faaiuga a le vasega o faatonu i le faamasinoga ua faamaonia ai le fasioti tagata o Anitelea Chan Kee, 22 tausaga, a o isi alii e toalima e lei faamaonia moliaga o le fasioti tagata paivalea.
O i latou ia e aofia ai Myron Felise, Jason Naseri, Tino Felise, Walter McCarthy ma Eti Filoa. Ina ua mae‘a ona lauina mai le faaiuga lea a le vasega o faatonu, ua taatia ai loa ma lea mataupu seia tālia le aso e lauina ai faasalaga o ē ua faamaonia le solitulafono.
Liliu mai le aiga o si alii na maliu ua faaalia le matua faanoanoa tele ma le toe fafagu uma mai o mafaufauga o le taimi na tupu ai lea faalavelave i le tina o le aiga poo le faletua o si alii o Navtej. Na ia faaalia o leoleo isi tagata ia e lē o fiafia i ai ona o le faatuai atu i le faalavelave lea, e pei lava ona taua foi i le taimi ua sola ina ua faatoa tupu lenei faalavelave.
Na faailoa mai e Harijinder Singh, e lata i le 26 minute o ia taumafai e faalototele ma sue se fesoasoani mo si ona toalua ua manu‘a ae o loo faatali pea i fafo leoleo seia mautinoa ua agai ese le au gaoi.
O le lomiga lata mai a le Herald o loo faailoa ai foi ni faamatalaga e faatatau i matua o le alii o Anitelea, o Avemaoe ma Iosua Chan Kee faapea na faamaonia foi moliaga tau feusuaiga e sefulu o Iosua Chan Kee ma moliaga e fa o Avemaoe Chan Kee e faatatau i le faiaiga faamalosi ma le faaoolima faamoemoeina ma le taumafai e taofia le faatinoina o le amiotonu.
O lipoti ia sa faasalalau i le nusipepa o le Herald o loo faailoa ai foi sa falepuipui Iosua Chan Kee mo le 14 tausaga ae o Avemaoe sa falepuipui i le valu tausaga na tatala i le masina o Ianuari o le 2005 ae o lona toalua na faatoa tatala i le 2008.
E maua se faaopoopoga o lea lipoti i le vaiaso fou seia sailia nisi faamatalaga auiliili o ia moliaga ma le tulaga foi e oo i ai le lauina o iuga o Anitelea ma lana vaega lea na aofia uma ai i nei faalavelave.
