O se alii faipisinisi o loo ia pulea ma faagaioia le auaunaga tau alaata televise totogi poo le pay TV o le Sky Pacific i Samoa, ua faamaonia sona moliaga o le umia o laau faasāina o le maruana.
O le alii o Grant Tormey na maua i totonu o lana taavale i se suesuega a leoleo ni maruana e faapea o ni lālā ma lau o le laau faasāina o fafao i totonu o se pepa sikaleti Pall Mall.
O le tausaga e 2007 na faia ai se suesuega faapitoa a leoleo i ni taavale i Tafaigata ma maua ai ia laau faasāina i le taavale a le pule o le Sky Pacific i Samoa. Sa molia uma lea alii ma lona toalua peitai na talosaga Grant e tau o ia e molia, ma o le faavae lea o le faaiuga a le faamasinoga e faamaonia lona moliaga ona o lona talosagaina o leoleo e tau o ia e faasaga i ai le moliaga ae lē o lona toalua, o se ata manino o lona silafia lelei o laau faasāina sa ia umia.
Ua faia la le faaiuga a le faamasinoga e faapafala se faasalaga o lea alii faipisinisi mai fafo e aunoa ma le faamaonia o sana solitulafono poo le discharge without conviction, ae ua poloaina na te totogi le lima selau, e tai luaselau limasefulu mo le totogi o galuega a leoleo ma le faamasinoga.