Faamaonia le ola i tupe mai faiga faatalitane

O le ulugalii o Sanele Sanele, 30 tausaga le matua, ma Metala James e 34 tausaga lona matua, o loo mafuta i se faigauo pe nonofo faapouliuli e lei faaipoipo, ua faamaonia o la moliaga e fesootai ma le solitulafono o le aafia i faiga faatalitane (prostitution).

O le Aso Faraile na tea nei na lauina ai le faaiuga a le tamaitai faamasino o Mata Tuatagaloa o le Faamasinoga Faaitumalo ma ua faamaonia ai moliaga e fitu.

E 4 moliaga o le ola i tupe e maua mai i faiga faatalitane, ma moliaga e 3 o le faatino o se gaioiga solitulafono na ave ai ni tamaitai talavou ua faatino ni feusuaiga ma ni tamaloloa ae maua mai ai tupe. E 9 moliaga sa molia faatasi ai i laua, peitai o isi moliaga e lua ua lē faamaonia ona ua lē mafai e leoleo ona tuuina atu ni molimau e lagolago ai. O le faasalaga maualuga o loo aiaia o solitulafono ua faamaonia e tolu tausaga e nofosala ai i le falepuipui. Faaalia e le tamaitai faamasino i lana faaiuga (verdict) i ana suesuega ma iloiloga i le tulafono na ia taunuu ai i se manatu, o i laua ua molia sa ola i tupe na maua mai i faiga faatalitane. “Sa la silafia lelei le mea sa la faia ae sa faaauau pea ona faatino”.

O se vaega lea o le faaiuga sa tolaulau e le faamasino a o punonou le ulugalii ma saofafai i le nofoa pito i luma o le potu faamasino Numera 2 o le Faamasinoga Faaitumalo.

I le taimi sa valaau ai molimau ma suesueina moliaga o le ulugalii, sa faaalia e leoleo sa faagaioi mai e le ulugalii le solitulafono (prostitution ring) i Malolelei sa faamautu ai.

E toalima ni tamaitai sa faaaogā ai e pei ona fai e le ulugalii ni feutanaiga ma tamaloloa e pei o ni alii Saina e galulue i se konekarate faufale, lea sa faia ni feusuaiga faaulugalii i le nofoaga faasao o le Malo e faafesagai ma le faletalimalo o le Tanoa Tusitala.

O isi feutanaiga a le ulugalii e faatino ai foi ia faiga e tamaitai ma ni tamaloloa e faamautu i nisi faletalimalo. Sa iai se tasi o tamaloa ua faaigoaina e le faamasinoga o Mr X, sa ia molimau ma ta‘ua ai sa ia totogi atu se tupe i le ulugalii ae faatino ni uiga faapea i se tasi o tamaitai. Ua faasā mai e le faamasinoga ona faasalalau suafa o tamaitai na aafia, lea sa molimau mo le itu a leoleo e oo i o latou nuu ma afioaga. O le vaiaso nei ua fuafua e faato‘ā lauina ai se faaiuga mo se faasalaga o le ulugalii o Sanele ma Metala. E iai se isi mataupu tau faiga faatalitane sa suesueina e le Faamasinoga Faaitumalo i le tausaga ua mavae sa molia ai ni tamaitai i lo latou aafia i le faatinoina o le solitulafono. Peitai na faaleaogaina e le faamasinoga moliaga, ona e lei mafai e leoleo ona saunia molimau e tatau ona lagolago ai moliaga.