Faamaonia le gaoi, faotaga tupe o transformer a le EPC

E 18 masina ua nofo vaavaaia ai le alii o Saweji Viliamu, na ioe i moliaga o le gaoi a o avea ma tagata faigaluega, faapea se moliaga o le tau faasese (false pretence), e mafua i ni transformer a le Faalapotopotoga o le Malosi Faaeletise (EPC) na leiloloa ma faia ai loa se suesuega, lea na maua ane e le gata o le ua molia na aafia ai, ae faapea foi nisi o le aufaigaluega a le EPC. E sefulutasi ni gaioiga na aafia ai le ua molia na lau ai nei masini a le EPC ma faatau i le kamupani scrap metal o le Pacific Recycles i Tafaigata. O Tesema 2007 na faatino ai le solitulafono a Saweji o le faatau o transformer ma maua ai ni seleni sa ia faaaoga mo ia lava.
O le tasi ana gaioiga na faatino o lona ave lea o se pepa i le Pacific Recycles e foliga o se faamaoniga mai le EPC o le kamupani lea e faatau i ai masini transformer, peitai o se faiga taufaasese ma o faatauga uma na faia na amata i le aso 4 e oo i le aso 11 o Tesema 2007 na maua ai se seleni e tusa ma le $4,371.30 sene. O le tupe na faaaoga e le ua molia e $3,451.30 sene. E tusa ma tolaulauga a leoleo i le faamasinoga ua uma ona toe totogi le seleni na aafia. I le silasila a le faamasino sili, Patu Tiavaasue Falefatu Sapolu, e le talafeagai se faasalaga faafalepuipui pe a fua i le aofaiga o le tupe na aafia i le solitulafono.
O le lipoti foi a le ofisa faanofo vaavaaia ua faaalia ai le matua salamo moni o Saweji mai lana solitulafono. O se tulaga lea na mamafa i ai le silasila a le faamasinoga aemaise ua maea ona taulimaina e leoleo se tusi mai le pulega o le EPC na talosagaina ai le toe faaui i tua o le latou tagi, ona ua maea ona aoai nisi o le aufaigaluega na aafia i le gaoia o le transformer ma uaea kopa, aemaise o nisi ua leva tausaga o galulue. Na folasia foi i luma o le faamasinoga se faamaoniga o se faatoesega na faia e le ua molia i le alii pule o le Pacific Recycles e tusa ai o lana gaioiga na ia faaseseina ai i se pepa na faaalia ai o le kamupani lea ua iai le ioega a le EPC latou te faatauina masini ma uaea kopa.
O le mataupu lenei sa valaauina i le faamasinoga maualuga ma ioeina ai e Saweji ona moliaga peitai sa toe suia lana tali i le tetee ina ua iai se loia e tauaveina lana mataupu, lea na sa finauina ai e le loia e lei faatinoina e leoleo aiaiga o le tulafono o le logo lea o le ua molia i ona aia tatau. E lei talia le finauga lea e le faamasino sili, ma faapea ona tuuina atu ai e le loia le mataupu i le faamasinoga o talosaga apili. Peitai na toe faaui i tua le apili ma faapea ona toe foi ane ai le mataupu mo se faaiuga ina ua faamauina pea le ioega a Saweji i moliaga, lea ua faia ai le faaiuga e nofo vaavaaia mo le 18 masina.