Faamaonia le faaoga o se matatao e faoo ai le oti

O le alii o Tavita Muagutu o Fogasavaii ua faamaonia e se vasega o Faatonu lona faaoo o le oti i se alii e suafa ia Leleai Itutu Muliufi o Fogasavaii lava.
O le faamatalaga o lenei mataupu na taua ai i luma o le Faamasinoga Maualuga, o se feeseeseaiga i le va o Leleai ma le tuaa o le alii o Tavita Muagutu na tulai mai i luma o le faleoloa o Muagututia Mose i le aso 30 o Setema o le 2006.
Na pailima le feeseeseaiga i le va o ia matai ma na iloa atu e le alii o Tavita ua aafia mai lona tama i le fusuaga.
Na faapea lipoti na foi i lo latou fale lea alii ma toe alu ane ai i le nofoaga o loo fufusu ai lona tama ma Leleai.
O se matatao fagota na ia umia na ia velo ai loa Leleai. O se osofaiga na lavea ai Leleai i lona ao ma na maliu ai lava lea alii.
Na teena e Tavita lona moliaga faapea o le solitulafono na faia ma le faamoemoe o Tavita e faaoo le oti ia Leleai.
O le finauga a le loia na tulai mo Leoleo i lea mataupu le alii o Leslie Petaia, o manaoga e tatau ona vaavaai i ai le vasega o Faatonu o lenei mataupu, pe sa iai le faamoemoe i le ua molia ina ia maliu ai Leleai i lenei osofaiga.
Faaalia e Petaia e manino lava o le vaega o le tino na osofai i le tao fagota na ioe lava Tavita Muagutu ina ua fesiligia le ono oo ai o le maliu ia Leleai.
O le finauga a le alii loia na tulai mo Tavita Muagutu, Tuala Joe Ponifasio, o le osofaiga o le tali atu lea a Tavita i le tigaina ai o lona tama ina ua fufusu ma Leleai ma o se gaioiga na tulai mai lava i lea taimi o le ita ma le le mautonu o le ua molia.
Faaalia e Leslie Petaia o loo iai isi itu o le tino sa tatau ona osofai e le matatao ae ua tai sao lava i le ulu o le ua maliu lea aupega ma mafua ai le maliu.
Na maea finauga a leoleo aemaise folasaga a molimau ona tuumuli loa lea o le vasega o faatonu aua le latou filifiliga.
O le iuga la lea o le faiga filifiliga ua faamaonia le solitulafono o le fasioti tagata faamoemoeina faasaga ia Tavita Muagutu o Fogasavaii.