Ua tolu nei tausaga talu ona tulai mai tuuaiga o le faaoolima matagā faasaga i se tasi sa avea ma Komesina Lagolago o le matagaluega o leoleo, susuga Tiatia Motootua, ae o le Aso Faraile na tea nei, aso 7 o Me 2010 na faato‘ā aumai ai le taunuuga o suesuega a le faamasinoga i moliaga e lua sa molia ai lea leoleo sinia, ua lē toe galue, ina ua lē toe faafouina lana konekarate.
O moliaga faasolitulafono sa tuua‘ia ai Tiatia Motootua, o le faaoolima poo le common assault ma le faaoolima matagā i se tamaitai leoleo.
Ua aumai le faaiuga ma ua faamaonia ai le moliaga o le faaoolima matagā, ae faalēaogāina le moliaga o le faaoolima.
O le fofogaina o le faaiuga lenei a le alii faamasino o le Faamasinoga Faaitumalo sa feagai ma le iloiloina o molimau, le afioga Tauiliili Fao Harry Schuster ua atofaina ai le faaiuga o le masina nei e lauina ai se faaiuga.
O le tausaga ua mavae na suesueina ai molimau a leoleo faapea molimau a lē sa molia e lagolago ai lona teena o moliaga.
O le masina o Me o le tausaga e 2007 na tulai mai ai se gaioiga na faia e Tiatia Motootua i se tamaitai leoleo lea na mafua ai se tagi a le tamaitai ofisa, ma faamalolo lē tumau ai lē ua molia mai ona tiute faaleoleo, a o faia suesuega ma tuuina atu le mataupu i le faamasinoga.
O le gaioiga solitulafono na tupu a o tolauapi le matagaluega o leoleo i tapenaga o le tuumalo o le Ao o le Malo, susuga Malietoa Tanumafili II.
Na umi se taimi o faia suesuega faalotoifale a le matagaluega i le mataupu, ma faia ai loa le fautuaga a le Loia Sili na ave i ai le faila o suesuega e le komesina sa iai, susuga Papalii Lorenese ina ia faia moliaga faasaga i lea leoleo sinia.
I se tolaulauga a le faamasinoga na faaalia ai, ua lē faamaonia le moliaga o le faaoolima ona ua lē lava molimau a leoleo e lagolago ai, ae o le faaoolima matagā e malosi molimau e lagolagoina ai le faamatalaga a le tamaitai leoleo na tagi, sa kisi faamalosi atu lē ua molia ia te ia ae sa ia teena ona e lei loto malie i ai. O le molimau foi lea a se alii leoleo sa iai i le taimi na tulai mai ai lea gaioiga, lea sa ia faamatala i lana molimau e faapea sa ia iloa atu lava le tetee e le tamaitai leoleo o le gaioiga a Tiatia Motootua na ia taumafai ai e faakisi le tamaitai ofisa.
