Faamaoni i mea iti, tofia oe pule i mea e tele

Atonu e lē fou le fuaitau a le Tusi Paia i le faitau, ‘faamaoni i mea iti, tofia oe e pule i mea e tele’. E lē faavasega gata lona faauigaina, e faigata foi lona faatinoga, ae logomalie ma suamalie lona taunuuga pe a tino mai.

E tasi foi le auga ma le faamoemoe o le taupeau mai ma aumau i lenei atunuu, o le fia saili mo se lumanai manuia o aiga.

O faailoga ma tofiga tetele o faamanuiaga lē aumaua lea ua tele ina pale mai ai le toatele o alo ma fanau Samoa, i totonu o aoga, galuega, faalapotopotoga, Ekalesia ma soo se mea, ua tauleleia ma tulaga maualuga ai Samoa i totonu o Niu Sila nei.

Poo le ā lava foi le ituaiga galuega, o le faamaoni lava o le faailoga numera tasi lea, e lē tau tuli ia maualuga ni faailoga ona siitia ai lea o le tulaga, e mafai foi ona ausia tofiga maualuluga, pe a e amata atu i lalo ma faamaoni, ae faaeaina i se aso.

O se tasi o tamaitai Samoa, Freda Nauer, ua mau tulaga ma maualuga le faaeaina i totonu o le galuega a le Warehouse i Birkenhead o loo galue ai i le faaitu i North Shore.

Na faamanuiaina i nisi o faailoga taualoa a le kamupani i se fonotaga tuufaatasi sa faia i Eden Park i le faaiuga o le vaiaso.

O lea fono tuufaatasi, e masani ai le Warehouse i tausaga taitasi, e tuufaatasia ai aufaigaluega uma o fale oloa tetele, e aofia ai Manukau, Pakuranga, Botany Down, Sylvia Park, St. Lukes, New Market, Downtown, Glenfield, Milford, o le Head Office ma Birkenhead, e molimauina iuga o galuega ma le tufatufaina o faailoga taualoa mo le lala e lelei iuga o galuega i lenei tausaga, aemaise o tagata faigaluega.

Mai lea tumutumu ma le toatele na auai, na filo ai lava ma le Samoa na molimauina e le toatele i lea po, faailoga na manumalo ai le tamaitai o Freda Nauer. E suamalie lagona o le faamaoni ma le tauleleia.
Na faamanuiaina i le lima tausaga o le auaunaga, o se tamaitai Samoa o loo aoaoina le tulaga tau i le saogalemu ma le soifua maloloina, aemaise o faailoga na lautogia ai le latou foi lala i Birkenhead.

Na manumalo i le Profit Cup award, Store of the year, Store Manager of the year. O tulaga maualuga faapea e mafai ona ausia, pe a faamaoni i totonu o galuega.