Faamanutina ma le Faatauaina o le Uiga o le Aso Maliu..

O le Aso Lulu o le vaiaso na te’a nei na faatumulia ai le faleaoga o le Aoga Amata a St Peter Chanel Preschool i matua ma uo sa mafai ona auai atu e molimauina le latou Easter Show na faataunu’uina i le itula e 11 i le taeao. E tusa ma le tolu vaiaso o faagasolo faa-a’oa’oga a le fanau aua lava tapenaga mo le faamanatuina o le taua o le Maliu o Iesu i lenei vaitau. O le Afioga Patele Peter Brown sa amataina le sauniga i se lotu sa faatinoina lava e le fanau ma faapena ai lava ona faagasolo atu i le faatinoga o le tala i le faalataina o Iesu ma lona faasatauroina. Na maofa le maimoa a matua ma uo na auai i le molimauina o le faatinoga e nei fanau iti o le faamoemoe o lea aso, ona sa ese fo’i foliga va’aia, o lagona ma le matamata atu a’o alo nei fanau e tusa ma a latou faatinoga. O le tele o le taimi sa faatalanoaina ai le mataupu i le maliu o Iesu ma lona toe tu manumalo mai le oti ma le tuugamau, o lona uiga ma lona faatauaina e le au Kerisiano, o le tele fo’i lena o le malamalama o le fanau ma latou maua ai le fiafia e faatinoina ai le faamoemoe lea, aua ua lava lo latou iloa i le taua o le faamanatuina o le vaitau o le Eseta e pei ona sa feagai ma le au Kerisiano i lena vaiaso ua mavae atu. Sa mafai ona iloa le loimata maliga ma le loto faafetai a’o faatinoina e le fanau lenei faamoemoe mai le taimi na faalataina ai Iesu, faatinoga o puapuaga e ala i le fetogi o lona tino i ma’a, feanu ma upu leaga ina ia faasa’oloto Parapa ae faasala Iesu se’ia oo atu ai lava le va’aiga o le faatinoina o le amoina o le satauro mamafatu, ma faapena ai lava ona aga’i atu se’ia taunuu atu ile mauga o Korokota ma faataunuuina ai loa lona faasatauroina.
Na matua lagona le fiafia e le fanau ina ua uma ona faataunuu lo latou faamoemoe i le faamanatuina ma le faatauaina o le Eseta po o le maliu o Iesu faatasi ma nai o latou matua i lea aso. Na saunoa fo’i le Afioga Patele Peter Brown e faafetaia le fanau ona o le maoa’e foi o lea laasaga ua oo i ai lo latou ola a’oa’oina e ala i le mafai ona faatino ole aga atu o Iesu i lona faasatauroina, ae maise o le tele o lo latou lototetele faatasi ai ma le agavaa e tautala ai ma faatino e pei ona sa molimauina e matua ma uo na auai mai i lea aso.O se polokalame e le taumate sa matua faafiafiaina ai foi matua ona o le latou va’ava’ai i le lototetele o fanau sa mafai ai ona faataunuuina lea faamoemoe taua mo le au kerisiano ma le lalolagi uma. Na faaiu e pei ona masani ai i taumafataga ma taligasua ma taape ai le fuamanusina ina ua faaiuina ma le manuia le Eseta 2009.