Faamanuiaina uma tamaiti i suega fusi faaiu a le FrankFrost Taekwondo i Ausetalia

O le Frank Frost Taekwondo, o le kalapu ua lauiloa i le tele i Kuiniselani ma isi setete o Ausetalia auā na o le pau lea o le alo Samoa o loo faafoeina lenei foi faagatama i lenei itu o le kelope aemaise lava i Kuiniselani nei.
O le Grading (Suega Fusi) mulimuli lenei a le FrankFrost Taekwondo Australia Club mo lenei Tausaga 2019, e amata mai i le White Belt (Fusi Pa’epa’e ) seia oo atu i le Black Belt (Fusi Uliuli ).
Ua faamanuiaina uma alo ma fanau e tusa ma a latou galuega fita i totonu o le fa kuata o le tausaga.
O le kuata muamua e amata atu ia Ianuari e oo ia Mati, kuata lua Aperila e oo ia Iuni, kuata lona 3 Iulai e oo ia Setema ma le kuata lona fā lenei na amata mai ia Oketopa e oo ia Tesema.
E talitonu maumaututu le alii pule, e ausia e tamaiti le sini o lenei tausinioga pe a fua i le ata vaaia ma le lagolago ma le faamaopoopo (commitments). O le alii pule o le FrankFrost Taekwondo, o le susuga ia Master Faalavelave Frank Frost, faatasi ai ma Yvonne Frost- Lowndes, Alfred Frost ma Alexander Frost o alo uma o le susuga ia Frank ua a’otauina e a’oa’o fanau i lenei foi taaloga logologoa.
O nisi o alo o loo a’oa’oina i le Kalapu e mai Ausetalia, Niu Sila, Filipino, Amerika, Afghanistan, South Africa, Saina faapea ma si o tatou atunuu o Samoa.  Na momoli le agaga faafetai tele o le susuga ia Master Frank ona o le faamaoni o tamaiti i toleniga i Aso Gafua ma Aso Tofi taitasi, ua mae’a nei toleniga a le kalapu, ma o le a toe amataina toleniga i le aso 13 o Ianuari 2020.
“E avea ai le Samoa Times e auina atu se leo faatauvaa, e fai ma sui o le kalapu, e momoli atu ai faamaisega ma faamafanafanaga, i aiga uma o si o tatou atunuu o Samoa, o loo aafia i le misela. Momoli atu faamanuiaga mai le kalapu a le Taekwondo mai Ausetalia nei i le Pulega a le Samoa Times faapea aiga, uo ma ē masani o si o tatou atunuu, i soo se vaega o lenei kelope.
Manuia tele le Kirisimasi, ma ia tatou aulia faatasi le tausaga fou 2020 i le manuia ma le fiafia, i le faatasi mai o lo tatou Matai sili. Alofaaga mai ia Faalavelave Frank Frost ma le kalapu a le Taekwondo Brisbane Ausetalia.”