Faamanuiaina se alo o Samoa fesoasoani Malo Ausetalia

O se tasi o fesoasoani a le Malo o Ausetalia mo le atinae o Samoa o le itu tau aoaoga lea ua faamanuiaina ai le toatele o alo ma tamafanau a lo tatou atunuu.
O le susuga Ainsof Soo, o se tasi o ia alo o Samoa sa ia maua le avanoa sikolasipi e faalautele ai ana aoaoga i le tomai o le computer programmer i le Iunivesite o Kuiniselani.
Ua mae‘a ana aoaoga ma ua foi i le atunuu ma lona faailoga o le Master of Information Technology i le vaega o le Software Architecture. O se tasi o tomai e faigata ona maua auā o se tomai e lē tofu maua uma e i latou o loo ave lenei mataupu e faasino i le faaaogāina o le masini faaonaponei mo fesootaiga le computer.
Ua faaalia e Ainsof o se avanoa tāua mo ia sa avatu e le Malo Ausetalia ona e lē gata ua maua ai lona faailoga maualuga o le Master, ae o lona taimi sa aoaoina ai i le iunivesite i Kuiniselani sa ia maua ai se isi poto sili atu mai le aooga faatasi ma isi tagata e iai foi o latou tomai i lana matata.
O lana faamatalaga o se isi foi lea tāua o le avanoa sa ia maua ona o se faataimuaga o lona olaga faataitai mo le lumanai.
O se isi lea vaega o le sikolasipi e pei ona sa aoaoina ai lea tamafanau a le atunuu i Canberra i Ausetalia lava, a o lei amatalia aoaoga o lona faailoga i le iunivesite o Kuiniselani. O le molimau a lea alii talavou o le atunuu, e ese le tāua o lea foi vaega o le polokalame fesoasoani a lea Malo, ona e oo ane i le taimi e faatino ai lona faamoemoe autu, ua maua le isi silafia i vaega e taulai i ai ana suesuega i le avea o se taitai lelei o le atunuu i le lumanai.
E $150 afe tala Ausetalia le faatupega atoa o le sikolasipi sa maua e Ainsof Soo ma ua toe foi mai o ia i le atunuu ma ua galue nei i le tasi o auaunaga tau fesootaiga i masini komepiuta a le kamupani o le Computer Service Limited le CSL.