O le aoauli o le Aso Toonai na faamanatuina ai le ta‘i 70 tausaga o le tama matua ia Faaluaseu ma le faletua ia Paepaelei Savaiinaea mai Vailele ma Lalomauga.
O le sauniga faamanuia sa saunoa ai le susuga i le toeaina ia Afoa Alapati Meatuaituuga Stevenson, o le Taitai o le Ekalesia LMS Pasefika.
Sa auai le tele o faafeagaiga faapea le Peresetene o le Leo o Tagata Samoa i Logan Faimalotoa John Pale, ma le paia i le nofoatoo o le mafutaga.
Na tasi moemoe le faatau paia a Tumua ma Pule e avea le fetalaiga a Leautuliilagi Malaeoalii Sogialofa Vaa Leapai e faafetaia aiga na lua e ala i le maau ma le milomilosia na tofusia ai le aufaigaluega a le Atua faapea le auvalaaulia.
O le susuga i le faafeagaiga ia Faavae Tagaloa sa fai ma fofoga o le aso ae fai ma sui o aiga na lua, le tofa ia Filoinuu Tagaloa e momoli se agaga faamalo ona o le tali faaaloalo o le atunuu.
Sa tapenaina le fofoga taumafa e le Nape’s Pacific Flavours Takeaway (Maualaivao Tusitala & Faanape Timoteo) faatasi ai ma le faaili logo mālie a le Niuula Band na faafiafiaina le aso atoa. Momoli atu faamanuiaga o le aso soifua o Faaluaseu ma Paepaelei mai le nofoaalo ma grandchildren faapea aiga uma, uo ma paaga ma le mafutaga a le Logan Samoa Inc i Logan, aemaise le Ekalesia LMS Pasefika Kuiniselani.