“Le auauna lelei e ma le faamaoni, ulufale maia i le fiafia o lou Alii”. O le faatomuaga lea a le tusitala ina ua molimauina le fiafia, mitamita ma le loto faafetai tele o le alii o Masanimaalii (Sani) Niuia-Tofa e ala i le alofa faaauau pea o le Atua ia te ia ma ana taumafaiga, o lona tinou i le faatinoga ma le faataunuuina o ona tiute tauave i totonu o le galuega i le ono tausaga ua tuanai atu. Lea la ua fua mai lona lē faalogologo tiga, lona faamaoni ma lona galue malosi ma le punouai ina ua na mauaina le tulaga o le taitai (Branch Manager) o le lala a le Coverstaff Recruitment i East Tamaki i Aukilani i Sasae.
O le afiafi o le Aso Tofi, aso 7 o Iuni, 2012, na tapenaina ai e le pulega aoao a le Coverstaff se pati/fiafia e faamanatuina ai ma faatāuaina ai lenei laasaga tāua ua ausia e le susuga ia Masanimaalii.
O se faamoemoe tāua tele aemaise o le amanaia lelei ai o le ausiaina e tagata faigaluega o tulaga pei ona ua ausia nei e Sani. Na manatu ma tapenaina e lenei matagaluega aemaise ona o lea e maua ane o se alo Samoa foi lea ua ma ausia lenei laasaga ma lenei tulaga maualuga i totonu o lenei matagaluega.
Na saunoa le alii pule o le matagaluega aoao, o le alii lenei o Masanimaalii, o se tagata tauivi tele ma tulaga ese mai lava i lona iloa ma lana maitau ina ua na mauaina le avanoa faigaluega i le ono tausaga ua tuanai atu.
E tele lava ni agavaa o le alii o Sani ma na matua iloga foi ona ia tauiviina nisi vaega mo le finauina o ni avanoa faigaluega o tagata Pasefika. Saunoa foi James Fling, o Sani o se tagata matamuli tele ae tumu foi i le faaaloalo toe finau malo i mea lelei mo le manuia o tagata lautele aemaise foi mo le manuia o le matagaluega.
E maitauina foi le loto alofa o le alii o Sani faatasi ai ma lona galue malosi ma le faamaoni mai lava ina ua matua atoatoa lona silafia i le faatinoga o lana galuega seia oo loa ina ua faamanuiaina i lona tulaga o le avea ma taitai.
Na auai tuaa o le alii pule o Masanimaalii i lenei faamoemoe tāua ma na maitauina le matua fiafia o matua ma aiga aemaise lava i nai ona alo tamaitai sa lotolotoi ai i le faatauaina o le ausia o lenei laasaga tāua e si o la tamā. Saunoa le tina o Fonoti Serafi, e la te lei mafaufauina e vave ona oo si o la atalii i lenei tulaga maualuga. O le mea lea ua ao ai le viiga ma le faamanu i le Atua ona o ana faamanuiaga mo le atalii.
O le molimau maumaututu foi na saunoa i ai le tina, poo le a lava le atamai o le tagata ae a le o faatasi ma le faaaloalo, loto maualalo ma le alofa e le aoga lava lea poto. O lagona ia o le tina o loo atagia i le galue faamaoni o Sani e pei foi ona maua i le saunoaga a le alii pule aoao o James. O se luitau manaia tele ma le faatupu manatu le sunoaga a le tina ia Fonoti e fai foi ma tapasa aua lava le manuia ma le agai pea i luma o tulaga e mafai ona faamanuiaina ai nai o tatou tagata i totonu o galuega i soo se matagaluega lava.
O le susuga ia Lui Ponifasio na ia taitaina le faamoemoe i le Lotu ma faafetaia ai galuega lelei uma i totonu o le matagaluega aemaise o le faapaiaina foi o le maota fou i Harris Road i East Tamaki, faatasi ai ma ona tagata faigaluega aemaise i latou uma o le a autovaa atu i ai mo le saiiliga o ni a latou galuega.
O le susuga ia Maa Sagala sa fai ma fofoga o le po ma na auai atu foi i lea fiafia le susuga i le tamaitai o Metotisi Komiti Faalavaau, o le Miss Samoa Niu Sila.
O le susuga ia Masanimaalii o le alo o Malaeola Niuia Tofa mai alalafaga o Leauvaa ma Saipipi i Savaii, ma si ona tina o Fonoti Serafi Niuia mai alalafaga o Vailima, Fasitoouta ma Sapunaoa i Falealili.
Ia malo le tauata‘i Masanimaalii, malo foi le tauivi ma le finau. “Aua ua mae‘a ma ua uma nisi feau ma nisi galuega lelei ona faatinoina ona faapea ane lea, o le auauna lē aoga lava a‘u i luma o le silafaga a lo tatou Atua”. Ia manuia tele lou tulai mai i lou tulaga faataitai, ma ia manuia foi nisi e toatele ona o lou agavaa.
