Aua ne‘i mitamita le tagata malosi i lona malosi, le tagata poto i lona poto, a ia mitamita ina ua e iloa le Atua….
Ua faaiuina manuia taumafaiga faaleaoaoga a se tasi o alo faasino i le faafeagaiga ma le faletua, le tamaitai o Gloria Raewynn Leota.
Ua tauaaoina le tikeri i mataupu tau pisinisi. (Bachelor in Business Analysis) mai le Iunivesite o Waikato. Ia o lagona masani lava o aso faapenei, o loimata maligi o le fiafia ma le olioli, auā e lē faigofie le tuua ai o aiga ma ē pele, ae finau pea ina ia taunuu i le sini ma foi mai ma se ‘ai auā aiga ma mātua o tapuai.
Lea la ua tau lau o le faamoemoe, ma o le viiga e foi atu pea i le Atua. Sa faapea ona apoapoai atu le tamā ia Peter i si ona afafine, “aua ne‘i mitamita ina ua e maua le poto aemaise lenei faailoga, ae ia mitamita ina ua e iloa lelei le Atua na foai mai le poto, ma faaaogā tatau mo lona viiga”.
Ia o tu masani foi lava o aso faapenei, o le fofoga taumafa lava e taualuga ai mea uma, auā lava pelega o fanau.
Sa matagofie ma felanulanuai le fofoga taumafa na gaseseina e le faleaiga fou ua tatalaina nei i Manukau ua faaigoaina o le ‘Bitez Fusion Restaurant’, i le 12 Lakewood Courts.
