Faamanuiaga mo sē ua Fiafia ina Pese ia

Ua i le vaitau foi o le seleselega o luluuga e ala i faauuga ina ua faaiuina ma le manuia tauiviga ma taumafaiga faalemafaufau a nisi ua faamanuiaina i tusipasi eseese mai Iunivesite eseese foi o lenei tausaga. O nisi o upu na tusia e alo ma fanau o le susuga ia Taulia Tafiti i ni posters sa faailoa mai ai lo latou loto fiafia ma le agaga mitamita tele, na ta‘u atu ai i si o latou tamā e faapea: “Tamā, ua taunuu malo le tau! Faafetai saili malo ia viia ai le Alii”
O se vaaiga matagofie ma le faamalosiau tele lea i nai alo ma fanau o le tamā ia Taulia auā o lea ua a‘e malo lona taumafai ma ua na faataatia foi lenei matatia lelei tele mo nai ona alo auā a latou fuafuaga ma le feagai ai ma aoaoga mo ni o latou foi lumanai.
Na saunoa le tamā ia Taulia ma faailoa lona loto faafetai tele i le Atua ona o lenei avanoa lelei ua faamanuiaina ai o ia, ma lona faamoemoe ua faataunuuina, o lana faafetai tele foi i nai ona mātua peleina le tamā ia Saveasoi Piki Tafiti ma le faletua ia Vineta Tafiti, aemaise foi o mātua o si ona faletua le afioga ia Pei So‘e Fereti Pei ma le faletua ia
Levalagi Pei.
Sa faafetai foi i nai ona aiga uma ma i latou uma na mafai ona lagolagoina ma maua ai le fesoasoani i soo se ala a o feagai ia ma le tauiviga i tausaga e tolu, lea ua mae‘a nei ma ua ia tauaaoina ai lona tusipasi o le Bachelor of Business & Information Management.
O le po o le Aso Faraile sa faia ai se aiga fiafia na tapenaina lava e si ona faletua ma le fanau. Ia Taulia, malo le lototele, malo le tauivi, malo le onosai faafetai le faaea aiga. Ua e fai ua mafai auā o lou faamoemoe ua tinipa‘ō ia malo le sailimalo.
O alofaaga ma faamanuiaga mo oe mai ou aiga uma i soo se kelope o le lalolagi, o nai ou mātua pele ma tuaa o si ou faletua, o si au fanau ae faasilisili alofaaga mo oe mai si ou faletua o Aiufi Tafiti.