“O o‘u moomooga ia alofa le Atua ma ia toe faaopoopo nisi tausaga se tele mo lo‘u ola, ina ia ou aulia atu ai le matua sa ausia e lo‘u tina, ina ia aulia ai le 102 tausaga na maliu ai. E lē gata i lea, ia mafai ona maua pea le malosi ou te aualofa atu ai pea i o‘u aiga uma i Niu Sila, Samoa ma Ausetalia”.
O le saunoaga ma saafiafiga ia a le tina matua ia Potoae Faaitu Faivalu o le afioaga i Toamua ma Afega, ina ua faamanatuina i le Aso Sa na faato‘ā mavae atu, le 89 tausaga o lona soifua. Sa toe faaopoopo i ai alofaaga ma faamanuiaga mai ona alo i Niu Sila, Samoa ma Ausetalia.
O le tina matua ia Potoae, o se tasi o ona alo, le susuga ia Pagamalie Iopu Faivalu.
O ia foi lea na fai ma sui o uso ma tuafāfine faapea aiga uma o le tina, e faaleo ma aumai le faamanuiaga mo lona 89 tausaga e pei ona faamanatuina.
O alofaaga mai ia Pagamalie Iopu Faivalu ma le tina ia Taituuga ma le fanau i Niu Sila. O Paepae Faaletatau ma Atalele ma le fanau i Niu Sila. O le susuga ia Lole Tamai ma le fanau, faapea le susuga i le alii a‘oa‘o ia Faaulufalega ma ona alo. O alofaaga foi mai nisi o le fanau o loo i Samoa atoa ma Ausetalia.
Ia manuia tele lou aso soifua tina, ma ia talosia ia tau lau o lou faamoemoe ma ou moomoga pe a tusa ai ma le finagalo faitoatasi o le Matai i le Lagi.
