Faamanuiaga 80 tausaga o le tina matua, Silotoolo Iota Aumaleinoa

O le soifua tulu‘i ma le faafualoaina, o le meaalofa mai le Atua.

O le molimau a le tusi o le poto, o lauao sinasina o le faailoga o le soifua poto.

O le Aso Toonai aso 21 o Aperila na aofia potopoto ai lana Ekalesia, o ona aiga ma e e pele i lona soifua, aemaise o nai ona alo ma le mamalu o le valaaulia, e molimauina ma patipatia le faamanatuina o le 80 o tausaga o le soifua o le tina matua ia Silotoolo.

Na muamua lava foi mea i matautu sa, e ala i le sauniga lotu na taitaiina e le susuga i le faafeagaiga ia Uatoa Faaali Alo o le Ekalesia Metotisi, o le Ekalesia lea a le tina ia Silotoolo, ae na lagona le atili matagofie o le sauniga ona o le tapuaiga a nisi o faafeagaiga mai isi Ekalesia sa auai. O le fofoga o le aso o Leapai Tavita, ae o le tofa ia Aumaleinoa Lelea na fai ma sui o le aiga e faafetaia Samoa na aofia potopoto.

Na solo malie le taumafataga manaia ma le matagofie, ona o le malie foi o siufofoga o le faaili a le Ieova o Irae na faafiafiaina le aso, aemaise o faafiafiaga a fanau a ona alo, ma le malosi ole Ekalesia poo le autalavou.

Na taape le valaaulia ma le agaga faamanu ona o faaaloaloga e ala i palapala malo. Ina ua mae‘a sa latou faafetai na fofogaina e le fetalaiga ia Tafaomalo Talasoo Seulupe.

O la a le tusi, E te faia e oe mea sili, ma e silisili ai lava.