E viia ma faafetai i le alofa laveai o le Atua, ua aulia manuia le atoaga o le 5 tausaga o le atalii Gafatasi Lupe Ierome. Afai e le atina‘e e Ieova le fale, e galulue fua o e atina‘e, o fanau o le anofale i totonu o le aiga.
O le susuga i le tausi matagaluega Rev Salafai Mika sa taitaia le tatalo faafetai i le Atua mo le faamanatuina o le aso soifua o le atalii, lea sa faia i le faleaiga o Garden City.
E faafetaia mea sili ua faia e le Atua mo le atalii e oo mai i le taimi nei, ona sa maua i ma‘i o le tino, ae ia alofagia le tuputupu a‘e ia ola maloloina, tausia i aao o le Alii, usitai i matua ae sili le Atua. Matou te faamanuia tele atu i lou aso fanau Gafatasi Ierome! Toaga i lau a‘oga fou faapea le lotu, ma tau taofiofi le ulavale.
O le fetalaiga Maelega Tuiono sa faatautaia le aso fiafia, aemaise nai fanau valaaulia. O le tofa Mailata Fili sa fai ma sui o le matagaluega Kalaiesetete e momoli le faafetai e tusa ai ma le faaaloalo i le taumafataga matagofie faapea meaalofa na saunia mo matua o le galuega ma le mamalu na auai.
Happy Big Five Gafatasi o Kalaiesetete! Alofaaga o Rev Salafai ma Fou Mika, Aloese Ah Kee, Aoga Aso Sa Metotisi Kalaiesetete, Maelega & Tiresa Tuiono & family, Patileti Fetu & family, aiga uma i Niu Sila ma Samoa, ae sili ou matua o Lupe Ierome & Sarai faapea lou tuafafine o Tiresa.
