Faamanuiaga 21 tausaga… Kasandra Fetaui Nielsen

O se lava ua fiafia ina pese ia. O le alaga foi o le olioli ma le faafetai, e lē faaitiitia lea, auā ana lē seanoa le tausiga matalasi a lo tatou Atua, ua mafua ai ona tatou patipatia le faamanatuina lenei o le 21 tausaga ua agalelei mai ai le Atua i lou soifua talavou.
O le Community Hall i Western Springs, sa mafuta faatasi ai le toatele o aiga ma uo mamae a le tamaitai o Kasandra Fetaui Nielsen i le Aso Sa 29 Setema, mo le faamanatuina o lona 21 tausaga.
Amatalia lava le polokalame o le aso i le sauniga lotu faafetai na taitaiina e le susuga i le faafeagaiga ia Pastor Neone Okesene. Faafoeina lava foi le polokalame e lē sa avea ma fofoga o le aso, le susuga ia Sina Nielsen.
Maeu foi le matagofie o tapenaga a le susuga ia Segi Koale ma le tina o le aiga, ia Sina Nielsen mo le aso faapitoa o si o la alo. E lē gata o le matagofie o le teuina o le keke aemaise foi o le ki na tauaaoina, o le faailoga o le pelega o fanau i mātua e ui ina ua tatala ma oo atu i le isi laasaga fou o le soifuaga.
Faafiafiaina foi le tamaitai fai aso fanau ma momoli alofaaga o le auvalaaulia e ala i pesepesega ma musika mālie a le fetalaiga ia Maiava Maiuu Pulusi ma le tausi ia Fetaui ma le faaili lauiloa a le Pineula Band aemaise na salani lava le atoaga o tapenaga o lea aso i le felanulanuai o kuka matagofie na matuā faamalieina ai le fofoga taumafa o le auvalaaulia, sa gaseseina lea e le Puataunofo Catering.