O le Tama Tane Malosi, o le Faasili le Atua, Avea o ni uso, Ola Faapaiaina Faaleagaga amiotonu ma amio mamā i le feagai ma tamaitai, Atinae ni ulugalii ma ni aiga mautu, Lagolago malosi le misiona a le Atua, Ia talepeina le faailoga lanu ma le faailoga lotu, faatasi ai ma le Faataunuuina o le poloaiga a Iesu.
O le manulauti lea sa faamamafaina e le polokalame o lenei tausaga lea ua tolu ai nei o tausaga talu ona faagasolo, ma o loo faauluulu i nisi o susuga i faafeagaiga mai nisi o Ekalesia Kerisiano i totonu i Niu Sila nei.
O le afiafi o le Aso Faraile, 20 o Iuni sa toe faataunuuina ai lenei faamoemoe tāua i Manukau City Baptist Church i Manukau ae faamae‘a i le aoauli o le Aso Toonai. O le polokalame i le afiafi o le Aso Faraile, o le itula e fitu na tatala ai le faitotoa mo le resitalaina o suafa o tamā, ma amata faagasolo ai loa le polokalame.
E silia i le luaselau tamā faapea susuga i faafeagaiga sa auai i lea po faatasi ai ma le Aso Toonai. Sa faatasi mai ai foi le konesula o Samoa le afioga ia Faolotoi e lagolago le polokalame ua faapitoa mo tamā uma.
O le susuga i le faafeagaiga ia Tino Tioa sa fai ma fofoga o le po, a o le faafeagaiga ia Muavae Mika na saunia le tatalo amata e tatala aloaia ai le faamoemoe o le Tama Tane Malosi o lenei tausaga.
O le aufaipese filifilia a tamā na latou lagiina viiga o le Atua faatasi ai ma le lagolago a le aufaipese a tamā o le Livingstone i Magele. O le autalavou a le Word of Life i Otahuhu na latou faatinoina aitema auā lava le faamaualugaina o le viiga o le Atua.
Na sosoo ma le saunoaga a le susuga ia Paul ma le faafeagaiga ia Tavale Matai‘a. O le susuga ia Laauli Michael Jones na maua foi lona sao e fai ai lana faamalosi i le tiute ma le galuega faaletamā i totonu o aiga ma ekalesia.
Na autu le saunoaga a Laauli i le galuega a le tiapolo e sau e fai i le tagata, o le gaoi, fasi ma faaumatia (Ioane 10:10), aemaise ai o lana tautinoga i lona soifua talavou a o lei avea ma tamā.
Na taualuga le afiafi i le folafolaina o le Afioga a le Atua e Pastor Iliafi Esera o se tasi o faievagelia, ma o le taitai aoao foi o le Assembly of God i Niu Sila.
O le susuga ia Pastor Poni Fonoti na saunia le valaau i tamā e manaomia le tatalo faamalosi aemaise o tamā faatoa talia le faaolataga a Iesu. E toatolu nisi o tamā faatoa faia latou filifiliga tonu i lea po e avea Iesu ma alii ma faaola i o latou olaga.
O le taeao o le Aso Toonai na toe ala usu ai tamā e faaauau le tufiina o manuia ua liligi i le aso fou, o le susuga i le faafeagaiga ia Rolani Mika sa fai ma fofoga o le aso ma o ia foi sa faafeiloaia le afioga i le Minisita, afioga Peseta Sam Lotu-Iiga faapea susuga i faafeagaiga sa auai aemaise o tamā na latou toe molimauina le sosooina o le Tama Tane Malosi i lona aso mulimuli.
Na amata i le tatalo a le susuga i le faafeagaiga ia Faasoo Auvaa ona sosoo lea ma le saunoaga a le afioga i le Minisita e tatala aloaia ai le polokalame i lea taeao.
O le susuga ia Eroni, Vaaiga Tuigamala ma Vaniah Toloa o i latou ia na saunia tautinoga i le Aso Toonai, ae o le folafolaina o le upu a le Atua na nafa lea ma susuga i faafeagaiga ia Iliafi Esera, Nicky Tutasi, Kuki Aloalii ma Lui Ponifasio.
Sa maua le kofe ma le sosisi na faatauina e le Ekalesia o le Life Church auā lava le faamalosi tino, na faatauina ai foi mitiafu ua uma ona lolomiina ai le Tama Tane Malosi.
O le faafeagaiga ia Tavale Matai‘a na saunia le tatalo mulimuli e tapunia aloaia ai le polokalame o lenei tausaga, ma le faamoemoe o le a toe faaauauina i le tausaga fou i le alofa ma le agalelei o le Atua.
