E manatu nisi o le ausia o le 80 tausaga o le faailoga manino lea o le soifua ava i le tamā ma le tina e pei ona talitonuina o le tulafono ese lea a le Atua, auā o le faamanuiaga lona faataunuuina e pei ona faamauina i le tusi tulafono.
Sa seāseā foi ona ausia le aulia o le 80 tausaga e se tagata Samoa i totonu o Samoa, peitai ua maitauina le agai pea i luga o le numera faitauina o le soifua laulelei ma le soifua faafualoa o nai o tatou tagata auā ua oo atu foi lava i le 90 ma le 100 le soifua o nisi.
O se vaaiga matagofie ma le faagaeetia, o lagona o le faafetai ma le viiga na matuā faateleina, aemaise o le loto ua tumu i le olioli ma le fiafia, ina ua mafai ona aulia mai ma le manuia le 80 tausaga o le soifuaga o le tina matua ia Tinei Feetau Fai Lee-lo. O le afioga i le faletua o le tiakono.
O le tina ia Tinei na soifua mai i le aso 9 o Aperila 1933; e toavalu o la alo ma le afioga i le tiakono, le tamā ia Feetau mai le alalafaga o Vailima. O le saunoaga a le tina na ia ta‘ua ai o ia o se tina finau ma galue malosi ona o lona faamoemoe ia maua e si ana fanau se olaga manuia.
O lea la ua autovaa uma mai iinei o laua alo ma faapena foi ona agai mai i ai ma i laua ma le tamā, ma ua latou maua faatasi ai se olaga fiafia ma le matagofie, o le viiga sili lea o le Atua. Na ta‘ua foi e le tina, o ia o le ulumatua a nai ona tuaa mai le fanau e toaiva.
Ua 25 nei fanau a ona alo, ae ua 11 fanau a fanau a nai ona alo, ona tuufaatasi lea ua maua ai le 44 o tagata ua tutupu mai i le tina.
O loo galulue nei Tinei ma le afioga ia Feetau o se tiakono i totonu o le Ekalesia Faapotopotoga Kerisiano Samoa i Magele i Sisifo.
O le susuga lava la i le faafeagaiga ia Petaia Lokeni na taitaia le mafutaga i se sauniga na momoli ai le viiga ma le faaneetaga i le Atua, na patipatia ma faafetaia ai le Suafa Paia o le Atua ona o le soifua ua faafualoaina ma ua aulia manuia ai le 80 tausaga o Tinei, i le afiafi o le Aso Faraile na tea atu nei.
E matagofie le soifua usitai i tuaa, e faamanuiaina le soifua tautua ma auauna ma le faamaoni i mātua, e faaeaina foi le soifua finau ma le lē faalogologotiga ae tulimatai lava i le Atua ma lona alofa tunoa.
Na faapena foi ona faatumulia le faamoemoe i lea po i le auvalaaulia, o uo ma ē masani, o sui o le aulotu ma nai aiga o le tina ia Tinei sa mafai ona autovaa atu e molimauina ma faatāuaina le faamanatuina o le aso soifua o le tina. Na felanulanuai teuga eseese ae faaiu foi lava i le taliga o le sua ma le fafagaina o le laualo i le lasi o meataumafa na saunia ma tapenaina lelei e nai alo ma fanau aemaise o aiga na lua.
Ia Tinei Feetau Fai Lee-lo le tina peleina, o le upu masani lava, O se tina lelei e sili lona tau nai lo o auro ma penina. Auā a leai foi se tina i totonu o se aiga ua leai foi se ola i totonu o lea aiga. Matou te momoli atu ai le faafetai tele ia te oe tina ona o lou soifua fianu ma le galue malosi, lea ua faamanuiaina ai i matou lau fanau. Ia o moomooga alofa ma faamanuiaga mo oe tina peleina, ia saga tulu‘i pea ma saga faaopoopoina pea e le Atua soifua nisi aso ma nisi tausaga se tele tatou te saga mafuta ai pea ma faia le finaglao o le Atua i soo se mea e finagalo ia i ai mo oe ma lou soifua.
Alofaaga: o le Susuga i le faafeagaiga ia Petaia Lokeni ma le faletua ia Seira Lokeni, o le paia lasilasi o lau Ekalesia i Magele i Sisifo, o ou aiga uma lava i Aotearoa nei ma soo se vaipanoa o le lalolagi, ae faasilisiliina ai alofaaga mai lau fanau uma lava o i soo se atunuu, aemaise o si au manamea le tamā ia Feetau Fia Lee-lo.
Manuina tele lou aso soifua!
