O se tulaga tāua tele le manino ma le malamalama lelei o le Aufaigaluega a le Atua i soo se ekalesia, i avanoa ua faamatuuina ma tatalaina e le Matagaluega o Femalagaiga a Niu Sila, mo le talosagaina o visa e aumau ai i Niu Sila, mo vaitaimi faatulagaina e tofia ma filifilia ai mo le galuega a le Atua.
O avanoa ua tatalaina mo Faifeau faatasi ai ma lona aiga, o se fesoasoani tele i le galuega fegasoloai ma le fefaataaloloai ona o suiga ma tofiga a ekalesia taitasi.
O nisi lotu e lē manaomia ni suiga, ae tuuoti feagaiga ma aulotu i Niu Sila poo Samoa foi, a o nisi e taitasi ma le taitolu tausaga ma faia suiga mo le aufaigaluega. Atonu o ekalesia ia o le a palasi tonu i ai faamanuiaga e pei ona lagolago mai ai le Matagaluega o Femalagaiga a Niu Sila.
O le Aufaigaluega e pei ona ta‘ua e aofia ai Faifeau, Patele, Tiakono ma isi. E lē o faapito foi manū ia tasi ua na o se ekalesia, peitai o soo se ekalesia lava ua lesitalaina faaletulafono ma aloaia i faiga faavae a faalapotopotoga ma ekalesia, o le a aloaia foi ma oo i ai le malosi o suiga e pei ona faalauiloaina.
O nisi o vaega tāua e ao ina silafia, e iai pea aiaiga faapitoa ua mae‘a ona faatulagaina mo soo se tagata ma soo se siosiomaga o loo iai, ma e ao ina suesueina atili talosaga uma ina ia mautinoa o loo faamalieina aiaiga faataoto.
Ae o se talanoaga lenei ma le sui sinia mo fesootaiga a le Matgaluega o Labour ma Femalagaiga a Niu Sila, le susuga ia Angie Enoka
E mafai ona talosaga se tagata sa avea ma faifeau i Niu Sila nei mo le silia ma le 3 tausaga ma ua toe foi i Samoa ona ua uma le visa ae o loo tumau pea le finagalo o le Ekalesia e toe faaauau lana auaunaga i Niu Sila nei?
Afai o le finagalo lea o se Ekalesia ina ia toe taliu mai se tasi e toe faaauau ana auaunaga ma ona tiute faalelotu i totonu o se Ekalesia i Niu Sila, e tatau lava i lē o loo fia talosaga ona toe apalai ma tuuina atu lana tusi talosaga i le matou Ofisa – Immigration Niu Sila i Apia i lalo o lenei visa patino mo le aufai tofi o le lotu, e toe talosaga ai lona ulufale mai i Niu Sila ma mafai ai i lalo o lenei visa ona toe faatino ma faaauau ona tiute faalelotu i totonu o se Ekalesia i Niu Sila.
O aiaiga o le tuuina atu o se visa o le a fua lava i tulaga taitoatasi a lē o le a talosaga mai i lea taimi.
O lenei polisi (policy) ua faafaigofieina ai le malaga mai o le au fai tofi o le lotu e auauna i Niu Sila, ma e tai tulaga tutusa lava ona aiaiga ma isi polisi tau tulaga femalagaaiga pe a fia talosagaina se visa e malaga mai ai Niu Sila.
Faapefea la mo se faataitaiga…se Faifeau ua mae‘a ona filifilia mai Samoa e se Ekalesia i Niu Sila nei, e mafai la ona talosaga sa‘o mo le visa lea e malaga mai ai ma faaaogā lea visa e galue ai i le Ekalesia mo le taimi atoa o loo iai i Niu Sila ma ono talosaga ai mo se nofomau pe a mae‘a le fā tausaga?
O le tuuina atu o se visa i lalo o lenei polisi patino mo le aufai tofi o le lotu, o le a fua lava i le ausia e sē o le a talosaga nisi o aiaiga i lalo o lenei visa.
Mo se faataitaiga e tatau lava i lē o loo talosaga ona pasiaina le tautala i le gagana peretania ma ia i lalo ifo o le 55 tausaga le matua i le taimi e tuuina mai ai le tusi talosaga mo se visa i lalo o lenei polisi faalelotu.
Afai e tuuina atu e le Ofisa nei se visa faatapulaa e malaga mai ai se tasi o le aufaigaluega a le Atua e faatino auaunaga i totonu o se Ekalesia i Niu Sila, o lona uiga o le faafeagaiga tausi Ekalesia e tatau lava ona galue i totonu o le Ekalesia lea o le a lagolagoina lona visa talosaga, i totonu o se taimi faatapulaa ma e lē mafai ona faaaogāina lenei visa e faigaluega ai i soo se isi lava galuega totogi a o iai totonu o Niu Sila.
O le visa faatapulaa e oo atu lona aogā i le fā tausaga ma e fua lava i le ausia o aiaiga ma tulaga i lalo o lenei visa.
A faapea e tuuina atu e le Ofisa o Femalagaaiga a Niu Sila se visa lalo o le polisi faalelotu mo le umi e fā tausaga, o lona uiga a mae‘a le fā tausaga lea, o le a mafai loa ona maua le avanoa e tuuina mai ai se tusi talosaga mo le faatalosagaina lea o le nofo mau i totonu o Niu Sila i lalo o lenei polisi, pe a mae‘a le fā tausaga talu ona tautua i totonu o se Ekalesia i Niu Sila.
Sa e ta‘ua i le ta talanoaga mulimuli le mafai ona talosaga o le toalua o le faafeagaiga mo se visa faigaluega e tatala (open), o lona uiga la e mafai ona faigaluega le faletua lea i soo se galuega i Niu Sila nei i le taimi lea o loo galue ai lona toalua i le ekalesia?
Ioe, o paaga poo taitoalua (se‘i tulou) o le au faitofi o le lotu o le a mafai ona tuuina atu i ai e le Ofisa o Femalagaaiga a Niu Sila se visa galue e lē faatapulaaina pe tatala lea e ta‘ua o le open work visa, e mafai ai ona faigaluega i soo se galuega totogi a o iai totonu o Niu Sila i le taimi o loo galue ai lona toalua i totonu o se Ekalesia.
Faamalamala atili mai le uiga o galuega ia faale-Ekalesia (religious workers) ma tofiga e mafai ona talosaga ai le tagata mo lea visa? (faifeau, patele, tiakono etc…)
O galuega a le aufai lotu poo ē galulue i galuega tau Ekalesia e tatau ona faamaonia mai lo latou sao i galuega i le itu tau faaleagaga mo le toatele o tagata o lea aulotu.
O nisi o aiaiga i lalo o lenei visa e aofia ai le faamautinoa o loo iai se tapuaiga tau lotu, poo se faalapotopotoga poo se Ekalesia tau tapuaiga i totonu o Niu Sila e latou te lagolagoina se talosaga mo se visa a lē o loo talosaga, ma o loo faapitoa lo latou auaunaga mo tiute uma faale-Ekalesia.
E tatau foi ona faamautinoa mai e lena faalapotopotoga le umi o le taimi e latou te manaomia ai le auaunaga a se faafegaiga.
Ma e tatau foi ona faailoa mai e lē o loo talosaga, a‘oa‘oga poo itu tau faailoga ia poo tiute foi faalelotu sa galue ai.
O tusi talosaga uma lava mo le fia maua o se visa i lalo o lenei polisi e faasino i le aufaigaluega a le Atua o le a vailiili uma e le Ofisa o Femalagaaiga a Niu Sila, e pei lava o tulaga tau aiaiga i isi foi visa pe a fia malaga mai i Niu Sila, ina ia iloa tonu ma manino le Ofisa mo ana faaiuga a o lei tuuina atu se visa faatapulaa poo se visa nofomau i lalo o lenei polisi.
Ma e toe faamanatu atu, o nei suiga fou i lalo o lenei polisi e faasino i le ‘au faitofi o le lotu, o le a tatalaina aloaia lea ia Novema o le tausaga nei.
