Na faamanino e le vaega a le malo feterale i lana faafinauga mo se faasalaga mo John Kruse ma lona faletua o Elaine Kruse ua i luma o le faamasinoga feterale e faapea, o le autu moni o le mataupu ua molia ai le ulugalii lea, e lē ona ua lē uma ona fausia le la fale, ae ona o le la faaaogā faagaoi o tupe sa tuuina atu e le feterale i lalo o le polokalame o le ‘1602’ e fausia ai le la galuega, e tali ai isi manaoga faaleaiga atoa ai ma manaoga tau pisinisi.
E $30.77 miliona le vaega tupe na faamatuu mai e le Ofisa o Tupe a le malo tele i lalo o le polokalame o le ‘1602’, lea na mataitu e le Faletupe o Atina‘e a Amerika Samoa, e fausia ai fale mautotogi mo tagata e maualalo a latou tupe maua. Ma e 312 talosaga sa talia ma faamatuu atu loa i ai vaega tupe eseese mo le faatinoina o galuega.
Na ta‘ua e le malo le tele o tuua‘iga ma faaseā sa faia faasaga i le Faletupe o Atina‘e i auala sa latou faatautaia ai le polokalame, peitai e ui i le tele o nei faaseā, o le tele lava o galuega sa mae‘a e aunoa ma ni faafitauli na tulai mai ai, i lalo o le vaavaaiga a le peresetene sa iai, o le kovana foi lena o Amerika Samoa ua iai nei, le tofa i le tootoo ia Lolo Moliga.
E pei ona ta‘ua e le malo i se vaega o le latou faafinauga, o le 2012 na amata faia ai e le Ofisa o le ASESRO sa latou suesuega e faatatau i ni isi o faafitauli sa maitauina i le polokalame o le ‘1602’, maua ai ni isi o galuega ua tuai ona mae‘a, ina ua lē tausisia taiala ma tulafono sa tatau ona faaaogā ai tupe o le polokalame, ma maua ai loa le avanoa o le FBI i le faaauauina o lenei suesuega e uiga i lenei mataupu.
Fai mai le malo feterale, e ui o loo autu le faafinauga a le itu tetee mo se faasalaga mo le ulugalii ua molia i le la faatamala lea e faamae‘a le la galuega, peitai o le mea moni e ao ona silafia e le faamasinoga, e lē o le autu lea o le mataupu ua mafua ai ona molia i laua nei, ae ona o le la faaaogā faasolitulafono o tupe a le feterale sa tuuina atu i lalo o le la vaavaaiga.
O loo finau foi le itu a le malo e faapea, e ui o lea ua ta‘ua e le Faletupe o Atina‘e a Amerika Samoa le faila o se latou talosaga faasaga i le ulugalii ua molia atoa ai ma isi tagata i lo latou lē tausisia o tuutuuga ma taiala mo le fausiaina o a latou galuega, ae o le mea moni e tatau ona silafia e le faamasinoga, e lē faavae moliaga ua faila e le feterale i le faatamala e faamae‘a le galuega.
“O le autu o le tagi a le feterale, o le liliuina lea o tupe a le feterale sa tuu atu e fausia ai le galuega e faamalie ai manaoga faaletagata. Lona uiga, o le faaaogā faagaoi lea o tupe a le feterale sa tuuina atu i lalo o le polokalame o le 1602”, o se vaega lea o le faafinauga a le malo feterale.
O le galuega a le ulugalii lea ua lē mae‘a, e lē o se solitulafono lea i le silasila a le feterale, ae o le a avea lea ma mau faailoga tumau e faailoa mai ai lo la manatu faapito mo na o laua lava, ae o se auala foi e faailoa atu ai i tagata Amerika Samoa gaioiga faasolitulafono sa la faia e tusa ai o lenei mataupu.
“O le solitulafono a le ulugalii lenei, e sili atu ona matuia nai lo le lē mae‘a o le fausiaina o le la galuega”, o le isi lea faafinauga a loia a le feterale. Sa ta‘ua foi le manatu māmā o le ulugalii i le talitonuga ma le faatuatuaga sa tuuina atu e le malo faalotoifale faapea ai le malo feterale, i le faaaogāina sa‘o o tupe e fausia ai fale mo nai tagata lima vaivai o loo latou matuā manaomia ni fale lelei e mautotogi ai.
Na ta‘ua foi e le itu a le malo i le latou faafinauga e faapea, o Amerika Samoa, e lē gata o se atunuu pito sili lea ona matitiva o loo faalele ai le tagavai a le Iunaite Setete, ae o faamaumauga a le Ofisa o le GAO a le malo tele i le 1999 o loo ta‘ua ai le tulaga lea, o le 61% o tagata o le teritori e faatulagaina o tagata matitiva.
Na faamatala foi e le malo le ulugalii ua molia e faapea, o se ulugalii sa soifua i se soifuaga taugata, ua la faia se tulaga e pito sili ona aafia ai le tamaoaiga o Amerika Samoa. La te lei gaoia foi le faitau selau o tupe mai se malo e tulaga lelei lona tamaoaiga, “ae ua la fao faamalosi meatotino mai tagatānuu o Amerika Samoa, o ni Nesionale o le Iunaite Setete o loo faaletonu le tulaga o le latou tamaoaiga o loo ola ai, o loo latou manaomia foi ni fale lelei e mautotogi ai, ae ua la lē faamaoni i le fausiaina o ni fale mo nei tagata, ae ua la faaaogā mai le polokalame o le 1602 e faamalie ai o la manao faapea ai ma manaoga tau i le la pisinisi”.
O le aiga a le ulugalii ua molia e pei ona ta‘ua e le malo, e lē o se aiga matitiva, pe a faatusatusa i le toatele o isi aiga i Amerika Samoa, e ui lava foi sa iai ni isi o aiga e lei mae‘a a latou galuega, sa latou taumafai pea ina ia faia auala uma e faamae‘a ai a latou galuega.
Toe lomia i le faatagaga a le SamoaNews