E faagasolo pea le taaviliga o le lalolagi, e alu atu aso ae sau pea foi aso ma le faavasegaina o galuega mamana ma le silisiliese a lo tatou Atua, ae lē mafai ai lava ona tuua pe tineia ifo ai tu ma aganuu a nai a tatou atumotu ma atunuu eseese i taimi e masani ai ona faamanatuina ma faatāuaina a latou aso faapitoa e pei foi o le faaiuga o le vaiaso ua tuanai atu, sa faapena ai ona vevesi tagata o le atunuu o Initia mo le faamanatuina o le latou foi lea aso faapitoa, o le “DUALI”.
O le Duali o se aso tāua tele i le atunuu o Initia auā e faapea o se aso o feiloaiga mafanafana a aiga aemaise foi o uo, e fegasoloai ai e faasoa ma talatalanoa fiafia, e feofoofoai ai lagona ma manatu.
E tai foliga tutusa ma le vaitau o le Kerisimasi lona tino mai. Ia o nisi lava nei o a‘oa‘oga e sili ona faatāuaina i totonu o le olaga a‘oa‘oina o le tamaititi i lona tuputupu a‘e.
O le Aso Lulu la na faamanatuina ai e le fanau, o mātua ma faiaoga o le aoga amata a St Peter Chanel i Otara le tāua o lea foi aso aemaise o le faailoa i fanau le manaia ma le matagofie o le nofo fealofani o tagata atumotu e ala i le fefaasoaiga o tu ma aganuu aemaise le amanaiaina e isi tagata mai isi atunuu o latou tu ma aga faa-Initia i totonu o le aoga.
E ese foi le tele o le faasoa i le uiga o le faatāuaina o le DUALI mai faiaoga ma mātua Initia i lena vaiaso, auā sa matuā faatino lava e faiaoga le gaseseina o taumafa, o le faamatalaina i tamaiti o laei ma teuga matagofie na laeiina e faiaoga Initia ma fanau, ia ae faaiu ai loa i le taumafaina o meaai eseese sa saunia i galuega faatino a le fanau ma faiaoga. O le olaga a‘oa‘oina lē faatuaoia lea o fanau e tatala ai avanoa uma mo lona iloa lautele i le lalolagi ma mea e tutupu ai.
O le vaiaso atu foi i tua sa faamanatuina ai e le lalaolagi atoa le tāua ma le fitā o le galuega faafaiaoga o loo feagai pea ma susuga a faiaoga i soo se faleaoga. Sa faapena foi ona faatāua i polokalame faagasolo ma faaauau a le aoga amata lea polokalamae.
Na fai ai foi ma se laugatogi na saunia ai e le pulega a le aoga ni nai meaalofa faatauvaa e tali atu ai, ma faailoa atu ai le agaga fiafia ma le loto faafetai o le pulega ona o le galuega faifia pea ma le lē faatua’oia a le vasega o faiaoga, i le faataunuuina lelei pea o o latou tiute aemaise o le faatinoina o lo latou valaauina e tusa ma le taleni faafaiaoga ua faamanuiaina ai i latou e le Atua.
O le vaiaso atu foi i tua sa faamanatuina ai e le lalolagi atoa le taua ma le fita o le galuega faafaiaoga o loo feagai pea ma susuga a faiaoga i totonu o soo se faleaoga. Sa faapena foi ona faatauaina i polokalame faagasolo ma faaauau a le aoga amata lea foi aso taua, ma na fai ai foi ma se laugatogi na saunia ai e le pulega a le aoga ni nai meaalofa faatauvaa e tali atu ai, ma faailoa atu ai le agaga fiafia ma le loto faafetai o le pulega ona o le galuega fiafia pea ma le le faatuaoia o le vasega o faiaoga, i le faataunuuina lelei pea o o latou tiute aemaise o le faatinoina o lo latou valaauina e tusa ma le taleni faafaiaoga ua faamanuiaina ai i latou e le Atua.
