E ta ane le lima i le afiafi o le Aso Sapati ananafi ua amata ona gasolosolo atu le mamalu o le atunuu i le hall a le Malaeola i Magele, o le nofoaga lea sa faia ai se sauniga faapitoa e faamanatu ai le atoaga o le tausaga talu ona aafia Samoa i le galulolo poo le sunami, e pei ona aafia ai i le aso 29 Setema 2009.
O lenei sauniga sa tuufaatasia lea e le Komiti e pei ona iai le afioga i le Konesula o le Malo Samoa i Niu Sila, le afioga Faolotoi Reupena Pogi, ma ni isi o tamalii o Samoa sa latou tapenaina lenei faamoemoe. Sa faapea foi ona auai mai ai ma sui o le Malo Niu Sila e pei o le afioga i le Minisita o Leoleo ma Falepuipui, Hon, Judith Collins, le Minisita o Mataupu tau Atumotu, Hon Georgina Te Heuheu, le afioga i le alii faipule ia Peseta Sam Lotu Iiga, le taitai o le Vaega Faaupufai a le Labour, Hon Phil Goff, atoa ai ma le afioga i le alii faipule o le Pitonuu o Magele, le Susuga Su’a William Sio.
O le afioga i le Komesina o le Malo Samoa i Niu Sila nei, le afioga ia Asi Blakelock ma lona faletua sa fai ma sui o le Malo Samoa, atoa ai ma le afioga i le Minisita o Lafoga le tofa Tuuu Anasii Leota e pei ona sa auai. Sa faapea foi ona auai ma le toatele o susuga i Faafeagaiga ma o latou faletua o soo se Ekalesia sa faatasi ai, atoa ai ma tamalii Samoa o loo galulue i faiga polokiki a lenei foi Malo o Niu Sila.
O le susuga i le faafeagaiga ia Rev Asora Amosa o le Ekalesia PIC Avondale sa fai ma fofoga o le po, ma o ia foi sa faasoasoaina le polokalame. Na amata lava i le saunoaga faafeiloai e pei ona sa saunoa i ai le afioga i le Konesula o Samoa i Niu Sila, ona alo ai loa lea i le sauniga lotu e pei ona sa galulue ai susuga i faafeagaiga mai Ekalesia eseese i totonu o Aukilani nei.
O le susuga Ben Taufua sa saunoa i se molimau faapitoa o le po ma ia tautino ai le tulaga ogaoga sa feagai ai ma si o latou aiga, aua o le latou aiga lea sa toatele lava i latou na maliliu ai i le sunami.
E ui ina tutulu le susuga Ben ona o tiga ma mafatiaga o faanoanoaga sa feagai ai ma si ona aiga, ae na ia tautino o loo soifua le Atua, ma o loo uumauina foi i Ona Aao lo tatou ola.
O le susuga Ps Tavale Mataia sa laugaina le Upu a le Atua, ma na ia saunoa ai i se matua e faapea, “I totonu o le vanu, o loo iai le faitotoa o le faamoemoe”. Na manaia le faalototele a le susuga i le faafeagaiga, ma na fetaui lelei lava ma le molimau a le susuga Ben Taufua.
E ui lava ina tele tiga ma faigata na ui i ai tagata uma o Samoa ona o le sunami, ae sa iai lava le faamoemoe ma o lena faamoemoe o le Atua lea.
Na mae’a le sauniga lotu ona alo lea i le taumafataga mama sa tapenaina e le komiti, ma po ai lea o le faamoemoe.
