“O le fanau o le Tofi ma le Taui mai ia Ieova mo mātua.”
O le finagalo autū lea o le upu faalaeiau na saunoa i ai le susuga i le faafeagaiga taulagi ia Pevise Lui i le sauniga lotu o le aso soifua o le alii o Paul, lea na faasalafa ai mo le tupulaga talavou aemaise o ana uo na aofia potopoto i le malu o le Tapcorp i le pitonuu o Melton i le Aso Toonai na se‘i mavae atu nei, aemaise foi le mamalu ma le paia o le valaaulia.
O le alii o Paul o le alo o le afioga ia Taefu Siumalae Silao mai le afioaga o Siufaga Falelatai, ma le faletua ia Maanaima mai le afioaga o Faleseela.
Na felanulanuai le aso i faafiafiaga a aufaafiafia eseese a o tali le sua ma taumamafa le valaaulia, a o feagai foi le Fofoga o le aso le susuga ia Fuaialii Anthony Sofe ma ona faiva alofilima.
O le molimau mo le olaga o Paul na fofogaina lava e si ona tuaa ia Taefu, ona tauaao atu ai lea o le ki o lona aso tele e si ona tina ia Maanaima, ma feula ai lana keke felanulanuai; o le fogafale pito i luga na lanu moana o le faamanatu lea e na o ia le tama, ae o isi fogafale e tolu pito i lalo na lanu piniki uma, o ata faamanatu ia o nai ona tuafāfine e toatolu.
O se tasi o vaega mataina o lona aso o lana faafetai na momoli mo nai ona mātua, ona aiga faapea ana paaga ma le valaaulia, ona o lo latou faaeaea, saunoa faafetai le afioga ia Taefu i le paia lasilasi o le aufaigaluega aemaise Samoa, ma faatino ai faaaloaloga masani mo aso faapenei.
Ona fai ai lea o le afioga ia Seve Tafatoa Masei mai le afioaga o Iva ma fofoga o le valaaulia e faafetaia le maau ma le milomilosia o le aiga alii ona o faaaloaloga ua maualuga ai le aso. Taape ma le olioli Samoa ae fo’i le viiga i le Tapaau o i le lagi
Faamanuia tele le Atua ma foai nisi tausaga se tele mo oe le atalii, Alofaaga mai ou matua, nai ou tuafafine, ou aiga uma i Melepone, Niu Sila ma Samoa.
Happy Birthday Paul
