Na matuā faatumulia le malu mo faafiafiaga i le pitonuu o Meadow Heights i le Aso Toonai na tuanai atu, i le mamalu o le aufaigaluega totofi a le Atua, o le paia lasilasi o tupu ma tamalii ae tainane le mamalu o le valaaulia, aemaise o ana uo ma tauaiga uma, ma nai ona alo ma a latou fanau, na sii faatasi le viiga ma le taulaga o le faamanū e ala i le sauniga lotu mo le faamanatuina o le 85 tausaga o le soifua o le tina matua ia Akenese.
Na mae‘a ona faafeiloai le mamalu o le valaaulia e le susuga ia Fepuleai Faoagali, ona alo lea o le susuga i le faifeau toeaina o le matagaluega a le EFKS a Melepone i Sisifo, le susuga i le faafeagaiga taulagi ia Aviti Etuale e taitaia le sauniga ma saunoa faamanuia ai i le soifua o le tina ina ia faafualoa pea e le tapaau o i le lagi.
Na mae‘a le sauniga ona sosoo lea ma le feulaina o lana keke, ona saunoa lea o se tasi o ona alo le lupe faalele a si o latou aiga le sususga i le faafeagaiga taulagi mai Glenfield Aukilani Niu Sila, le susuga ia Iosefa Remoni Faoagali, mo le molimau matagofie o le soifua o si o latou tuaa.
E toatele nai ona alo ma tauaiga na afifio ma talaaao mai mai Niu Sila, faapea foi isi setete o Ausetalia. Na mae‘a le sauniga matagofie, ona alo lea i le taumafataga ma faasolo ai polokalame masani mo aso faapenei.
Na iai faafiafiaga na saunia e ona alo ma a latou fanau, faapea ma siva a nisi o tauaiga, aemaise o le vii o si o latou tina na lagiina e si ona alo ia Fepuleai.
Ona alo lea o le aiga alii mo faaaloaloga mo le aufaigaluega a le Atua, ma saunoa ai Fepuleai e momoli le faafetai i susuga i faafeagaiga aemaise o le mamalu o le valaaulia.
O le susuga i le toeaina ia Aviti na saunoa e faafetaia le maau ma le milomilosia o le aiga alii, ma toe faamanuia ai i le soifua o Akenese aemaise o le aiga atoa, ma ta‘ape ai le fili alii ma le mama ua lomi ma le vaa ua goto ona o faaaloaloga ua maualuga.
O le taumafataga felanulanuai ma le matagofie o le aso na saunia e le Catering a le Tianas Pacific Flavaz, o le musika malie o le DJ a Samuelu Sila.
O moomooga alofa mo oe le tina peleina, faaopoopo pea e le Atua nisi tausaga o lou soifua mo la tatou mafutaga, aemaise o lona finagalo. Manuia lou Aso Soifua. Alofaaga mai lau fanau uma lava ma ou aiga. We Love You.
