Faamanatuina 80 tausaga soifua o Fuaolefau Le Pouli Lemalu Pati Tafa Petelo

E naumati lagona o le agaga faafetai aemaise o le pese o le faaneetaga ma le taulaga o le faamanū na siitiaina e alo ma fanau faapea aiga ma le auvalaaulia sa latou molimauina le faamanatuina o le 80 tausaga o le soifua o si o latou tuaa sinasina, le susuga ia Fuaolefau Le Pouli Lemalu Pati Tafa Petelo.

O lagona faagaeetia aemaise ina ua poto moli i le futiafu e tasi, ona e le gata i alo ma fanau faapea tauaiga malaga mai i isi vaega o Niu Sila faapea Ausetalia ma Samoa, aemaise foi ua atoa tapenaga a alo ma fanau ina ua auai atu i ai ma le susuga i le faafeagaiga ia Kafareli Sasagi ma le faletua faapea le mamalu lasilasi o si a latou ekalesia EFKS Owairaka.
O lea foi le tovine o loo galue ma auauna ai e ala i le tofiga tiakono, le tamā matua poo le tuaa sinasina ia Fuaolefau.

Molimauina foi e le susuga i le faafeagaiga le tautua mae‘ae‘a aemaise o le galue malosi, loto alofa ma le loto aiga o lenei tuaa sinasina. O lona soifua tausi feagaiga foi lea ua mafua ai, e ui ina ua sailiili matagi mai ma aumau i Niu Sila nei, ae molimauina pea e le fanau lagona faaalia o le tamā i lona manaoga ma tausisi ina ia faaauau pea lana tautua e ala i lona tofi tiakono sa galue ai, i si o latou afioaga faapea le ekalesia EFKS i Mulifanua.

E le gata i lea, ae na molimauina foi i lea po le taaloga faipele, sa ausia ai e le tamā i aso o lona soifua talavou, le siamupini o le paga heavyweight i faipelega sa faia i lea vaitaimi i le Tivoli i Samoa ma isi motu o le Pasefika.

O se faamoemoe sa matuā faatumulia ai le War Memorial Hall i Mangere Bridge i le faaiuga o le vaiaso na tea nei. O le susuga ia Fuaolefau o le faasa‘osa‘o o le paia o le aiga i Faletafaoga, i Fuailolo‘o i Mulifanua, o loo susǖ ai Fuailefau ma le Pouli.

E to‘a 13 ona alo, ma o se faamoemoe sa matuā mataina ona e le gata o le lava tapena o le fanau i tulaga eseese mo le faamanatuina o le aso soifua o si o latou tamā, aemaise o faafiafiaga eseese na saunia foi e grandchildren a le tamā, mo le faafiafiaina o le auvalaaulia. Sa lē alo tamala foi le gaseseina o lenei faamoemoe i le taumafataga tele ma le felanulanuai a le auaunaga a le Talimanao Catering.

O le tofa ia Tafa Pati Junior Fuaolefau Pati, se tasi o alo o le tamā, sa fai ma fofoga o le po sa faafetaia le paia lasilasi o le auvalaaulia, aemaise na avea foi o ia e fai ma sui o le fanau, e molimauina le tausiga mae‘ae‘a, e lē manao e iai se tulaga e faaletonu aemaise o ana moemitiga ina ia manuia lumanai o si ana fanau. O se tasi o tulaga sa lagona ai le mafatia ae lē faagaloina ai pea le faafetai i le Atua, ona o lana faamalologa – ona e faatino lenei faamoemoe ae o loo faataotolia i le maota gasegase le tamā matua ina ua apoia e le falaefu ma gasegase o le tino ona o le tulaga o le matua o le soifua ua iai.

Na o ni nai itula na faataga mai ai i tua e le fomai ona o le faamoemoe sa feagai ai. Na mae‘a ona toe momoli ai lea o le tamā i le maota gasegase mo le faaauauina o togafitiga.

Le tamā ia Fuaolefau Le Pouli Lemalu Pati Tafa Petelo, ma nisi o ona alo a o usu le pese faamanuia o lona aso soifuaSusuga i le faafeagaiga ia Kafareli Sasagi ma le faletua sa auai atu i le faamanatuina o le aso soifua o le tamā