O le aso o le alaga fiafia ma lagona fia vivii a‘e ma faafetai i le Atua ona o le tele o nei tausaga ua ia foai mo le tamā, e pei ona iai le Aso Toonai na se‘i mavae atu nei, lea na faamanatuina ai le atoaga o le 70 tausaga o le tamā, le Tofa Alae Paulo Tele‘a.
Na taitaiina e le susuga Reverend Faleu Tausa Futi le sauniga lotu. Na sosoo ai lea ma le faapaiaga o le Keke ona alo loa lea i le taumafataga matagofie. Sa faatumulia lava lea afiafi i paia o le aiga, aemaise ai uo ma paaga a le Tofa Alae, ae lē gata i lea sa auai mai ai foi ma le Tina Malolo Manumalo ia Mema Fesuluai. Na auai mai foi le fanau mai Ueligitone ma Kalaiesetete.
O lenei faamoemoe sa faia i le faleaiga a le susuga ia Amataga ma Bella Lee Hang Catering i Magele. O se tasi o alo e faasino i le Tofa Alae, le Tofa Talo poo le Afioga ia Tuu sa fai ma Fofoga o le aso.
O le mae‘a ai o le taumafataga na faapea ona taualuga ai lea afiafi i faaaloaloga e pei ona masani ai i aso faapenei. Na faaiuina ma tatala le filialii i lea afiafi i le tatalo na saunia lava e le susuga i le taitai o le sauniga.
Alofaaga e lē mavae mo le Tamā peleina, lau Tofa Alae Paulo Tele‘a mai le Tausi ia Ioana, lau fanau ma fanau a lau fanau.
