Faamanatuina 50 tausaga Fotunuupule Su‘esu‘e

O le Aso Gafua na tuanai atu na faamamalu ai le aso malolo o le Eseta, ae na valaaulia faaaloalo ai e le tausi ia Mile Su‘esu‘e ma nai ona alo, le mamalu o la latou Ekalesia, faatasi ma tauaiga o uo ma paaga a le tamā o le aiga, le fetalaiga ia Fotunuupule, ina ia patipatia ma faamanatu faatasi lona aso soifua.
O le susuga i le taitai aoao o le Ekalesia Aso Fitu Tutoatasi i Melepone le susuga ia Ropati Siatua na taitaia le sauniga, ma le tatalo faamanuia o le soifua o Fotu na saunia e le susuga i le faafegaiga ia Sani Auimatagi, faatasi ma le tapuaiga a le susuga i le faifeau ia Anamoa Koko.
O le susuga ia Fotu o le Tiakono Toeaina o le matagaluega aoao a Melepone, ma na matagofie naua lona Aso ona o le saofaiga a isi toeaiina o le Ekalesia.
Na faataoto uma fuafuaga o le aso e aunoa ma le silafia e le fetalaiga ia Fotu, na faato‘ā manino lava lana silasila ina ua taunuu atu i le malu, ma ia maitauina ai le mamalu ma le paia lasilasi o le aufaigaluega o lana Ekalesia e pele i lona loto, aemaise o le mamalu o le auvalaaulia, a o tuufaatasi o latou siufofoga e usuina le happy birthday.
Sa felanulanuai  le taumafataga na saunia e le Leatalua Catering, a o faagasolo faafiafiaga eseese. O le Fofoga o le aso o le susuga ia Patrick Tusa, ma na maau foi le aiga alii i faaaloaloga mo le aufaigaluega.
O le tasi o itu matagofie na agia i le saunoaga faafetai a le susuga ia Fotu, o le aso tonu lava foi lea na atoa i ai le 77 tausaga o le soifua o si ona tuaa ia Leua Fuataga, lea foi na faafiafia mo si ona alo ia Fotu. Na faaiuina lona aso tele i le tauaao atu e nai ona alo o le meaalofa o tickets e lua e malaga tafafao ai ma lona tausi i Tahiti mo le 2 vaiaso.
Faafetai  i le Atua ua matou maua se tamā alofa ma le agalelei. Thanx Dad n Happy Birthday, Love from Lesina & Saaga Meredith, Jason & Ruby, Liliu, Ana and your dearest grandchildren Miriana & Jahim, ma alofaaga e lē mavae mai si au manamea e toatasi o Mile.
Alofaaga mai lau Ekalesia, aemaise o susuga i faafeagaiga Pr Ropati Siatua ma le faletua, ma Pr Auimatagi ma le faletua. Faapea ma paaga uma a lau leitio le Samoa matalasi 97.4.