Faamanatuia le Aso Fanau o Tumua Tumua

O le Aso Faraile talu ai na potopoto faatasi ai aiga ma uo o le faletua ia Tumua Maua Tumua i le faamanatuina o lona aso soifua i le RSL Liverpool. O i latou na auai e aofia ai le afioga i le Konesula o Samoa i Sini Tofa Manogiamanu Fonoti Etuale Ioane ma le faletua ia Safanua le uso o Tumua. Sa auai foi le isi uso matua ia Fotu Fuifui ma lona alii ia Manu Siaosi Fuifui. I Samoa e toatolu tuagane o Tumua o loo galulue faafaifeau i le EFKS. Sa auai ai foi sui o aiga na lua aemaise le faatamā o le Asosi Tusitala Samoa i Sini, Afioga Leaupepe Matautu faapea le Leitio FM89.3.

 
O le tamā ia Tuisafia Pitoau Tumua na saunoa e faafeiloai le aofia ma momoli le faafetai mo le auai atu e molimauina le limasefululima o tausaga o le soifua o si ona faletua. O le faletua ia Tumua Maua Tumua o le alo o le Alii fomai ia Dr Maua ma le tina ia Perise Maua ua faiilagi uma le folauga mai Vaivasetai. Sa galue o ia tausi ma‘i (RN) mai Samoa i le taimi o soifua nai tuaa. O le taimi lea sa galue ai foi lona aiga ia Tuisafia Pitoau Tumua i le Ofisa o Tupe (Treasury) o se fai totogi sinia a le malo. O le tausaga e 1988 na tuua ai Samoa ma galuega mautu na iai mo seisi laasaga fou i Ausetalia nei.

 
E oo mai i le taimi nei o loo galulue pea i laua mo le atiaeina o le aiga faapea foi mo le tapuaiga a aiga o tapuai mai i Samoa. Na taunuu mai foi le tina ia Tumua ma toe tuliloaina galuega fomai tausi ma‘i na iai Samoa ma o loo galue ai pea i lenei auaunaga i Sini nei. E toalua o la alo ia Sipiki ma Leslie ma o loo tapuai i le Ekalesia Katoliko. O se tina foi e iloga le lagolago i mea e fai a Samoa i tausaga taitasi aemaise i le Asosi Tusitala lea na faatino la latou Siva tele o le Aso fanau muamua i le lua vaiaso talu ai. Na faailoa e le afioga Tuisafia Pitoau Tumua lo la latalata i aiga ma nuu aemaise si o tatou atunuu pe a faafofoga i tala mai Samoa ma nusipepa o loo maua ai tala mai Samoa.
.