Faamanatu pea i tupulaga e na o Iesu le Mapusaga

“Toetu ma ia susulu atu”. O le faaautu ma le auga lea o le mafutaga a le falefitu a tupulaga talavou ma le lalovaoa a le Pulega a Manukau, a le Ekalesia Penetokoso, lea na faataunuuina i le Aso Toonai ma le Aso Sa.

O le faatasiga i le Aso Toonai na faatinoina ai e le autalavou a Magele se tala puupuu na momoli mai ai se feau tāua ma le aogā tele e toe fafagu mai ai i tupulaga talavou, o Iesu, o le mapusaga mai soo se mafatiaga.

Na maimoaina le matautia o le malosi o le tiapolo ma ana ‘au i le taumafai e faaosoosoina ma faatoilaloina aemaise o le faananau ina ia na manumaloina loto o le tupulaga e faatinoina ai ma faaleagaina ai le ola tau saili ma le ola taumafai atu o le fanau mo le Atua.

Na ta‘ua e le sui o le autalavou le papatisoina o le latou mafutaga e fai ma tagata faaolaina ma auauna e tautuaina le Atua, ma lo latou talitonuga o le papatisoina o le fufulueseina lea o le tagata tuai poo le olaga tuai.

O le tanumia ma le tafieseina lea o uiga tuai ma tu leaga, ae ua toe tulai mai o se tagata faafouina faatasi ma le mana faaola o le Atua. Ia talitonu i le Atua ma ia ola i le faatuatua i le Atua, ma susulu atu ai mo nisi o fia maua le Atua.

O le autalavou a Otahuhu na latou faatinoina le mafatia ma le āfaina o lagona o tupulaga ona o le popole ma le atuatuvale, e mafua mai i totonu o aiga, aoga, faauoga ma nisi lava faafitauli e fai ma auala e faapopoleina ai ma oo ai loa ina fai faaiuga ma filifiliga lē talafeagai ona ua lē manatua Iesu ma lē tapasāina e le Atua le loto ma le mafaufau, ae ua manaumaloina e le tiapolo.

Na mae‘a faaaliga a autalavou nei ona maua lea o le avanoa na faafofoga ai i le tautinoga a le taulealea o Poasa Sipaea, na ia momoli mai ai i tupulaga se isi faamalosi e ala i lona faasoa mai i ona lagona ma ona manatu i taimi a o manumaloina o ia e le tiapolo. Sa faasoa foi Poasa i si ona uso na maliu fasia i le ala ona o filifiliga ma faaiuga lē taupulea a nisi ae āfaina ai le ola ma aafia ai foi lagona o tupulaga talavou i totonu o soo se siosiomaga ma mafutaga mafana.

O le isi faamalosi na faasoa i ai Poasa na ia faamanatu mai ai i tupulaga, poo le ā lava le ituaiga ola e te filifilia, lelei poo le lē lelei, ia e manatua e alofa taumulimuli pea lava lou tamā ma lou tina ia te oe seia oo i le iuga. Ia manatua foi e silafia lelei e le Atua ou tiga ma ou lagona, ae lē mafai ona tali mai pe a e lē filifili faatasi ma ia.

Na faaiuina le polokalame a tupulaga i le upu folafola na saunia lelei e le susuga i le faafeagaiga na aami, Pastor Tavale Matai‘a.

Na logoitino matagi lelei auā na matuā oo ifo i lagona ma loto o le tupulaga talavou aemaise foi o le aufaafofoga o le sauniga, le pa‘i mai o le agaga o le Atua e ala i le laugaina o lona finagalo, e le susuga i le faafeagaiga, ma le feau tāua sa fai ma faamalosiau ma faalautele atili ai le faamanatu a tupulaga o le pulega a le Ekalesia.

O sauniga ma mafutaga nei o loo fai pea ma auala e taofiofimauina mai ai tupulaga talavou mai le pa‘ūū atu i le loloto o le olaga leaga lea e faananau mātua ia aua lava ne‘i oo i ai nai fanau.

O polokalame foi nei e tatau ona faamalosia auā e talitonu e maua ai le fia auai ma le fia mafuta o tupulaga ma faaalia ai a latou taleni ma tomai e faaaogāina ai lo latou ola mo le Atua.
O se fuafuaga lelei tele foi ma le talafeagai lea na faataunuuina auā lava le tapenaina o tupulaga ina ia manuia o latou lumanai ma ia viia ai tau lava o le Atua e ou le lalolagi ua tatou ola ma soifua ai nei.