O le vaiaso lenei ua faagasolo ai galuega faalauiloa i Samoa atoa e faamanatu ai aso e 16 o le tali atu i sauaga faasaga i tamaitai. O se vaiaso tāua tele i le lalolagi ma ua aofia ai foi Samoa i le toe fagufagu pea le leaga o le faia pea o sauaga i tamaitai.
I Samoa lava ia o lea ua tutu faatasi le faalapotopotoga na faatautaia lenei aso faamanatu i tausaga e tele ua tuanai, le Asosi o Tamaitai o le Pasefika ma Saute i Sasae o Asia, PPSEAWA ma le matagaluega o mataupu tau Tina ma Tamaitai, Atina‘e o Nuu ma Aga Fesootai faapea ai le Faataua le Ola, o le Toomaga mo e Puapuagatia ma le vaega o mataupu o aiga i totonu o le Matagaluega o leoleo auā le faamalosia o le feau tāua e fia faalauiloa atili, e solitulafono le faia o sauaga i tamaitai.
O le unai o lenei polokalame ua aofia ai le savali o loo faia i le aso (Aso Lua 27 Novema, 2012) i le taulaga o Apia. O sauniga lotu na faia i le amataga o le vaiaso e talosia ai lenei taumafaiga, o aoga o le tali atu i osofaiga faasaga i tamaitai (self defense) ua faatautaia e le susuga Seti Atimalala, o se faiaoga o le taaloga o le taekwando ma ua ofo atu e aunoa ma se totogi lea aoga i le lua vaiaso o lenei faamoemoe.
Ua faapea foi ona iai ma aoaoga ua faalauiloa ai auala e taofiofi ai le loto ita, ma se sulu ua faatamo‘e i Savaii mo le faalauiloa atili lava o lenei taumafaiga.
O polokalame i luga o televise, leitio ma nusipepa ua faatino uma ina ia mafai ai ona ofi atu ma sao fautuaga ua faatautaia auā lava le faaitiitia o lenei faafitauli i totonu o Samoa.
I Samoa lava ia e lē o ‘asa le vaiaso ma lipoti a le ofisa o Leoleo i le tele o sauaga e feagai ma tamaitai o le atunuu. E lē gata i sauaga matagā, o sauaga o le mafaufau ma sauaga o le tino, le fasi ma le aafia o tamaitai i le tele o vevesi ma o totonu lava o le aiga lea e tele ina aafia ai tamaitai.
O le autū o lenei tausaga, ua faapea, “Filemu i totonu o le aiga, Filemu o le Lalolagi – taofi nei loa sauaga faasaga i tamaitai”. O se autū ua laga sa‘o ai lava le faafitauli o le tulai mai o nei faiga faalēalofa i tamaitai i totonu o aiga, ma seiloga lava ua taofia sauaga i totonu o aiga faato‘ā mafai lea ona sailia se filemu i fafo atu.
E lei mamao atu foi ni lipoti o se tamā Ululoloa na tutuli solo lana fanau ma lona toalua ina ua faasua‘avā ma e lua aso na taofia ai le tina i le falemai ona o manu‘a o le fasi o ia.
O lea e lei maua lava e leoleo le tamā o le aiga ua alu ma ave le tamaititi e toatasi o le fanau lea e toaono. Ua tea i tua le tina ma ua vaaia uma ia ma lana fanau e le Toomaga mo e Puapuagatia. O se tasi o tamaititi na togafitia ua ta‘e uma le ulu i le tā a lona tamā.
O le isi tina talavou mai Siumu ua ave foi e le Toomaga mo e Puapuagatia ma le Ofisa o Leoleo, ua susunu e le toalua foliga i se misa na tulai mai i le aiga o le tamaloa i Siumu. Na taumafai le aiga o lona toalua e ufiufi ae faapepē manu‘a ae uma ane toe fasi sulu mai loa i le ofisa o leoleo.
O vaaiga nei na ta‘ua e faalapotopotoga uma nei ua tutu faatasi ma le PPSEWA, ua lē o faaitiitia i Samoa ma o mafuaaga lava o le va faaleulugalii lava ia, o le tagofia o le ava malosi, o le lē lava o le faasoa ma ua faatuputupulaia pea e lē o iai ma se vaaia o se faaitiitia.
O le taumafaiga a nei faalapotopotoga i Samoa ia iai se suiga, ia iai se ola e faasao mai ma ia tutu faatasi Samoa uma e taofia nei sauaga ua faia faasaga i tamaitai.
